కల్ట్ సినిమాకు సీక్వెల్

ప్రస్తుతం ఎక్కడ చూసినా సీక్వెల్స్ హవా నడుస్తోంది. ఇందులో భాగంగా పాత హిట్ సినిమాల్ని రీమేక్ చేయడం లేదా సీక్వెల్ చేయడం అనే అంశంపై జోరుగా సోషల్ మీడియాలో చర్చ సాగుతోంది. ఈ నేపథ్యంలో, ఓ కల్ట్ సీక్వెల్ పై ఆసక్తిరక ప్రకటన చేశాడు హీరో సూర్య. అదే గజిని చిత్రం.

సూర్య కెరీర్ లోనే విలక్షణ చిత్రంగా నిలిచింది ‘గజిని’ సినిమా. అప్పట్లో సౌత్ ను ఓ ఊపు ఊపేసింది ఆ మూవీ. మళ్లీ ఇన్నేళ్లకు ఆ సినిమా సీక్వెల్ పై చర్చ మొదలైంది.

“గజిని-2 ఐడియా అల్లు అరవింద్ గారిది. సీక్వెల్ సాధ్యమౌతుందా అని నన్ను అడిగారు. కచ్చితంగా కుదురుతుందని చెప్పాను. చర్చలైతే మొదలయ్యాయి. ప్రస్తుతానికి ప్రాసెస్ లో ఉంది. గజిని-2 వస్తుందనే అనుకుంటున్నాను.”

ఇలా తన పైప్ లైన్ లో ‘గజిని-2’ కూడా ఉందనే విషయాన్ని బయటపెట్టాడు సూర్య. ఇదే సినిమాను అమీర్ ఖాన్ హిందీలో రీమేక్ చేసి బ్లాక్ బస్టర్ హిట్ కొట్టారు. బాలీవుడ్ కు వంద కోట్ల క్లబ్ ను పరిచయం చేసింది ఈ సినిమానే.

తాజా సమాచారం ప్రకారం, ఈ సినిమాను ఒకేసారి తమిళ్ తో పాటు హిందీలో చేయాలని అరవింద్ ప్లాన్ చేస్తున్నారట. మధు మంతెనతో కలిసి తమిళ్ లో సూర్యతో, హిందీలో అమీర్ ఖాన్ తో సమాంతరంగా ఈ సినిమా చేయాలని అరవింద్ ఆలోచన.