బాధితురాలు.. హంతకురాలు.. లెజెండ్

అనుష్కను ఇప్పటికే బొమ్మాలిగా చూశాం. భాగమతిగా చూశాం. దేవసేనగా కూడా చూశాం. ఇప్పుడు అనుష్క నుంచి అంతకుమించిన ఉగ్రరూపం వస్తోంది. అదే ఘాటీ.

అనుష్క తాజా చిత్రం ఘాటీ. ఈ సినిమా గ్లింప్స్ రిలీజైంది. అటవీ ప్రాంతంలో, ఘాట్ రోడ్ల మధ్య నడిచే కథతో ఈ సినిమా తెరకెక్కిందనే విషయం ఈ వీడియో చూస్తే అర్థమౌతుంది. ఇక ఇందులో అనుష్కను ప్రజెంట్ చేసిన విధానం భయం పుట్టించేలా ఉంది.

ఒక వ్యక్తి తల నరికి, ఆ తలతో నడుచుకుంటూ వచ్చే సీన్ ను గ్లింప్స్ లో చూపించారు. ఈ ఒక్క సీన్ తో సినిమాలో అనుష్క పాత్ర ఎలా ఉండబోతోందనే విషయంపై పూర్తి స్పష్టత ఇచ్చారు మేకర్స్

క్రిష్ దర్శకత్వంలో తెరకెక్కుతోంది ఘాటీ సినిమా. యూవీ క్రియేషన్స్, ఫస్ట్ ఫ్రేమ్ ఎంటర్ టైన్ మెంట్స్ బ్యానర్లపై తెరకెక్కుతున్న ఈ సినిమాలో అనుష్క పాత్రలో ఓ బాధితురాలు, ఓ క్రిమినల్, ఓ లెజెండ్ కనిపిస్తారని చెబుతున్నాడు దర్శకుడు.

ప్రస్తుతం అనుష్క పాత్రలో గ్లింప్స్ మాత్రమే విడుదల చేశారు. సినిమా విడుదల ఎప్పుడనేది చెప్పలేదు. తాజాగా ఈ మూవీ షూటింగ్ పార్ట్ కంప్లీట్ చేసుకుంది. హరిహర వీరమల్లు సినిమా నుంచి పక్కకు జరిగి, ఘాటీ సినిమాను క్రిష్ తెరకెక్కించిన సంగతి తెలిసిందే.