రైల్వే జోన్ శంకుస్థాపన వేళ డీఆర్ఎం లంచావతారం

విశాఖ రైల్వే శాఖలో ఉన్నతాధికారి లంచావతారాన్ని చూసి అంతా ముక్కున వేలేసుకునే పరిస్థితి ఉంది. ఆయనకు ఎంతో మంచి పేరు ఉండడమే ఇందుకు కారణం. ఆయన విధి నిర్వహణలో కరెక్ట్ గా ఉంటారని ఒక ఇమేజ్ అయితే జనంలో ఉంది.

అటువంటి ఉన్నతాధికారి చేతులు చాచి అవినీతిని ఆహ్వానిస్తారని ఎవరూ అనుకోలేదని అంటున్నారు. విశాఖ రైల్వే డీఆర్ఎం గా ఉన్న అధికారి ఒకరు లంచం తీసుకుంటూ సీబీఐకి అడ్డంగా దొరికిపోయిన ఉదంతం ఇపుడు కలకలం రేపుతోంది.

అవినీతి విశ్వవ్యాప్తం అది ఎక్కడైనా ఉంటుంది అనుకుంటే మామూలే కానీ రైల్వే శాఖలో అవినీతి కేసులు డీఆర్ఎం స్థాయిలో చోటు చేసుకున్నవి దేశంలో రెండే రెండు. అలా ఒక డీఆర్ఎం ఎపుడో అవినీతికి పాల్పడ్డారు అని చెప్పుకున్నారు. ఆ రెండవ వ్యక్తిగా విశాఖ డీఆర్ఎం నిలిచి రికార్డుని క్రియేట్ చేసారు అని అంటున్నారు. ఆయన లంచం తీసుకుంటూ రెడ్ హ్యాండెడ్ గా సీబీఐ అధికారులకు దొరికిపోయారు అని అంటున్నారు

వాల్తేరు డివిజన్ లో మెకానికల్ బ్రాన్ పనుల కోసం టెండర్ల వ్యవహారంలో ఒక కాంట్రాక్టర్ నుంచి పాతిక లక్షలు డిమాండ్ చేశారు. దానికి సంబంధించి మొదటి వాయిదాగా పది లక్షల రూపాయలను ముంబైలో తీసుకుంటుండగా ఆయన సీబీఐకి దొరికారు.

విశాఖ డీఆర్ఎం ముంబైలోకి ఒక హొటల్ లో ఈ మొత్తాన్ని తీసుకుంటూ సీబీఐ కి బుక్ అయ్యారని అంటున్నారు. దీంతో ఆ డీఆర్ఎం బంగళాతో పాటు ఆయన నివాసంలో ఇతర చోట్ల పెద్ద ఎత్తున సీబీఐ సోదాలు చేపట్టింది. ఆయన అవినీతి మీద వల పన్ని మరీ సీబీఐ ఈ విధంగా పట్టుకుంది. దాంతో ఆయనను పూర్తి స్థాయిలో సీబీఐ అధికారులు విచారించే పనిలో పడ్డారు. తొందరలో విశాఖ రైల్వే జోన్ పనులు ప్రారంభం అవుతున్నాయి. కోట్లలో అదంతా సాగనుంది. ఈలోగానే అవినీతి అవతారం బయటపడడంతో రైల్వే శాఖ మొత్తం ఉలిక్కిపడింది.