దిల్ రాజు అసలైన గేమ్ ప్లాన్ ఇది

గేమ్ ఛేంజర్ సినిమాకు సంబంధించి గ్రౌండ్ ఈవెంట్స్ భారీగా ప్లాన్ చేస్తున్నారనే విషయం తెలిసిందే. అయితే ఎక్కడ.. ఎలా లాంటి వివరాలు మాత్రం బయటకు రాలేదు. ఎట్టకేలకు గేమ్ ఛేంజర్ ప్రమోషనల్ ప్లాన్ ను బయటపెట్టాడు నిర్మాత దిల్ రాజు.

“9న లక్నోలో టీజర్ లాంచ్ చేస్తున్నాం. దాని తర్వాత అమెరికాలోని డాలస్ లో ఓ ఈవెంట్ పెడుతున్నాం. తర్వాత చెన్నైలో ఈవెంట్ ప్లాన్ చేశాం. జనవరి మొదటి వారంలో ఏపీ, తెలంగాణలో 2 ఈవెంట్స్ ప్లాన్ చేశాం.”

ఇవి కాకుండా, మధ్యమధ్యలో మీట్ ది ప్రెస్ కార్యక్రమాలు కూడా ఏర్పాటు చేయబోతున్నారు. ఇలా తన సినిమా ప్రచార ప్రణాళికను బయటపెట్టాడు దిల్ రాజు. నిజానికి దిల్ రాజు సిసలైన గేమ్ ప్లాన్ ఇది కాదు. ఇకపై ఆయన కోలీవుడ్ లో పాన్ ఇండియా సినిమాలు తీయబోతున్నాడు. ఒకప్పటి నిర్మాత, ప్రస్తుత రియల్ ఎస్టేట్ వ్యాపారి ఆదిత్యరామ్ తో ఆయన చేతులు కలిపారు.

“ఎస్వీసీ-ఆదిత్యరామ్ మూవీస్ అనే బ్యానర్ స్థాపించాం. గేమ్ ఛేంజర్ ను తమిళ్ లో రిలీజ్ చేస్తున్నాం. ఇది గేమ్ ఛేంజర్ కు మాత్రమే పరిమితం కాదు. తమిళ సినిమాలు కొనసాగిస్తాం. విజయ్ తో చేసిన వారిసు సినిమా తర్వాత మరిన్ని తమిళ సినిమాలు చేయాలనుకుంటున్నాను. ఆదిత్యరామ్ తో కలిసి తమిళ్ లో పాన్ ఇండియా సినిమాలు నిర్మిస్తాను.”

ఇలా తన అసలైన గేమ్ ప్లాన్ బయటపెట్టారు దిల్ రాజు. ఇప్పటికే తమిళనాట నిర్మాతగా అడుగుపెట్టిన దిల్ రాజు, ఇకపై కోలీవుడ్ లో రెగ్యులర్ గా సినిమాలు చేస్తానని ప్రకటించారు.