కేజీఎఫ్ లో ఖాన్సార్.. నిజమేనా?

ఇప్పుడంతా క్రాస్-ఓవర్ కథల ట్రెండ్ నడుస్తోంది. దీనికి సంబంధించి ఇప్పటికే లోకేష్ కనగరాజ్ ఓ ట్రెండ్ సెట్ చేశాడు. ప్రశాంత్ వర్మ ఆల్రెడీ అదే దారిలో నడుస్తున్నాడు. మరి ప్రశాంత్ నీల్ సంగతేంటి?

ప్రశాంత్ తీసిన 2 సినిమాల కలబోతతో మరో సినిమా రాబోతోందనే ప్రచారం చాన్నాళ్లుగా నడుస్తోంది. మరీ ముఖ్యంగా సలార్-2 లో కేజీఎఫ్ ప్రస్తావన ఉంటుందని.. కేజీఎఫ్ తో ఖాన్సార్ ప్రపంచాల్ని నీల్ కలపబోతున్నాడనే ప్రచారం చాన్నాళ్లుగా నడుస్తోంది.

ఎట్టకేలకు ఈ ప్రచారంపై హీరో యష్ స్పందించాడు. ఇదంతా కేవలం సోషల్ మీడియా సృష్టి అని తేల్చిపడేశాడు.

“ఇది పూర్తిగా సోషల్ మీడియా ట్రెండ్ మాత్రమే. ఈరెండు సినిమాల మధ్య ఎలాంటి క్రాస్-ఓవర్ కథ ఉండదు. కేజీఎఫ్, సలార్ ఫ్రాంచైజీలు వేటికవే డిఫరెంట్ ఎక్స్ పీరియన్స్ ఇస్తాయి.”

ఈ సందర్భంగా మరో బ్రేకింగ్ న్యూస్ కూడా బయటపెట్టాడు యష్. కేజీఎఫ్ ఫ్రాంచైజీకి పార్ట్-3 కూడా ఉందని ప్రకటించాడు. పార్ట్-2లో హీరో ప్రయాణిస్తున్న నౌకపై బాంబు దాడి జరిగి సముద్రంలో మునిగిపోతాడు. కానీ అతడు బయటపడతాడు.

నాలుగేళ్ల తర్వాత తిరిగొస్తాడు. ఆ నాలుగేళ్లు అతడు ఎక్కడున్నాడు, ఏం చేశాడనే అంశాలతో పాటు మరిన్ని ఎక్సయిటింగ్ ఎలిమెంట్స్ తో పార్ట్-3 వస్తుందని, ప్రశాంత్ నీల్ తో తను రెగ్యులర్ గా దీనిపై చర్చలు సాగిస్తూనే ఉన్నానని ప్రకటించాడు యష్.