ఎన్టీఆర్ సినిమా ఇంకాస్త ఆలస్యం

కొన్ని రోజుల కిందటి సంగతి. ఎన్టీఆర్-ప్రశాంత్ నీల్ సినిమా అట్టహాసంగా మొదలైంది. ఆ వెంటనే రెగ్యులర్ షూట్ అన్నారు, కానీ కుదర్లేదు. అక్టోబర్ నుంచి షూటింగ్ అన్నారు. కట్ చేస్తే, అక్టోబర్ నెల కూడా గడిచిపోతోంది.

నిజానికి ఈ నెలలో చిన్న షెడ్యూల్ పెట్టుకోడానికి దర్శకుడు ప్రశాంత్ నీల్ రెడీ అయ్యాడు. కానీ 2 ఇబ్బందులొచ్చాయి. వీటిలో ఒకటి ఎన్టీఆర్ అందుబాటులో లేకపోవడం, అతడు వార్-2 సినిమా సెట్స్ పైకి వెళ్లాడు.

నీల్ సినిమాకు, వార్-2కు లుక్ లో తేడాలు వస్తున్నాయి. అందుకే ముందుగా వార్-2 షెడ్యూల్ పూర్తిచేయాలని ఫిక్స్ అయ్యాడు ఎన్టీఆర్. ఇక మరో సమస్య ఏంటంటే, మైత్రీ నిర్మాతలు ఇప్పుడు మరో పెద్ద సినిమాపై దృష్టి పెట్టే పొజిషన్ లో లేరు. వాళ్లకు కనీసం మరో నెల రోజులైనా టైమ్ కావాలి.

ఈ కారణాల వల్ల తారక్-నీల్ సినిమా సెట్స్ పైకి రాలేదు. తాజా సమాచారం ప్రకారం, డిసెంబర్ నుంచి ఈ మూవీ రెగ్యులర్ షూటింగ్ ఉంటుంది. ఇంతకుముందు చెప్పినట్టుగానే 2026 సంక్రాంతికి సినిమాను తీసుకురావడానికి ఎలాంటి ఇబ్బంది ఉండదంటున్నారు నిర్మాతలు.

ఈ సినిమాలో హీరోయిన్ గా ముందుగా రష్మిక పేరు వినిపించింది. తాజాగా రుక్మిణి వసంత్ పేరు వినిపిస్తోంది. అయితే ఇప్పటివరకు ఇంకా ఎవ్వర్నీ ఫిక్స్ చేయలేదు.