యాంక‌ర్ వ‌స్తోంద‌ని… బ‌స్టాండ్ ప్ర‌ధాన‌ మార్గం మూసివేత‌!

ప్ర‌ముఖ యాంక‌ర్‌, న‌టి అన‌సూయ వ‌స్త్ర దుకాణం ప్రారంభోత్స‌వానికి వ‌స్తోంద‌ని ఆర్టీసీ బ‌స్టాండ్ ప్ర‌ధాన మార్గం మూసేశారు. ఈ ఘ‌ట‌న వైఎస్సార్ జిల్లా మైదుకూరులో చోటు చేసుకుంది. స్థానికుల స‌మాచారం మేర‌కు… మైదుకూరు ఆర్టీసీ బ‌స్టాండ్ ప్రాంగణంలో ఖాళీ స్థ‌లాన్ని ప్రైవేట్ వ్య‌క్తుల‌కు అద్దెకు ఇచ్చారు. ఈ స్థలంలో వ‌స్త్ర దుకాణం ఏర్పాటు చేశారు. దాని ప్రారంభానికి సెల‌బ్రిటీ అయిన అన‌సూయ వ‌స్తుండ‌డంతో ర‌ద్దీ ఏర్ప‌డింది.

దీంతో ఆర్టీసీ ప్ర‌ధాన మార్గం ద్వారా బ‌స్సులు బ‌య‌టికి రావ‌డం ఇబ్బంది అని భావించిన అధికారులు ఏకంగా ఆ ద్వారాన్నే మూసేసిన‌ట్టు స్థానికులు చెబుతున్నారు. ఈ కార‌ణంగా బ‌స్టాండ్ నుంచి బ‌స్సులు బ‌య‌టికి వ‌చ్చే దారి మూసుకుపోయింది. ఆర్టీసీ ప్ర‌యాణికుల‌కు తీవ్ర ఇబ్బందులు ఎదుర‌య్యాయి. అధికారుల‌పై ప్ర‌యాణికులు మండిప‌డ్డారు.

ర‌వాణాశాఖ మంత్రి ప్రాతినిథ్యం వ‌హిస్తున్న ఉమ్మ‌డి జిల్లాలో ఈ ప‌రిస్థితి ఏంట‌నే ప్ర‌శ్న ఉత్ప‌న్న‌మైంది. మైదుకూరు ఆర్టీసీ అధికారుల‌పై చ‌ర్య‌లు తీసుకోవాల‌నే డిమాండ్స్ వెల్లువెత్తుతున్నాయి. యాంక‌ర్ కోసం ఏకంగా ఆర్టీసీ బ‌స్టాండ్ ప్ర‌ధాన మార్గాన్ని మూసేయ‌డం ఏంట‌నే నిల‌దీత ఎదుర‌వుతోంది.

ప్ర‌త్యామ్నాయ మార్గం చూసుకుని, ప్ర‌యాణికుల‌కు ఇబ్బందుల్లేకుండా చూసుకోడానికి బ‌దులు, ఇలా చేయ‌డం స‌బ‌బేనా అని ప్ర‌శ్నిస్తున్నారు. అయితే ప్ర‌యాణికుల‌కు ఇబ్బంది లేకుండా మ‌రో మార్గంలో బ‌స్సుల్ని తిప్పిన‌ట్టు అధికారులు చెబుతున్నారు.