ఎమ్మెల్యే కొలిక‌పూడి శ్రీ‌నివాస్‌కు షాక్‌!

టీడీపీ నేత‌, మాజీ ఏఎంసీ చైర్మ‌న్ ర‌మేష్‌రెడ్డిపై 48 గంట‌ల్లోపు చ‌ర్య‌లు తీసుకోక‌పోతే ఎమ్మెల్యే ప‌ద‌వికి రాజీనామా చేస్తాన‌ని ప్ర‌క‌టించిన తిరువూరు ఎమ్మెల్యే కొలిక‌పూడి శ్రీ‌నివాస‌రావుకు గిరిజ‌నులు షాక్ ఇచ్చారు. అస‌లే కొలిక‌పూడి అంటే సొంత పార్టీలోనే గిట్ట‌ని వాళ్లు చాలా మంది ఉన్నారు. టీడీపీ అధిష్టానాన్ని ఇబ్బంది పెట్టేలా నిత్యం ఏదో ఒక వివాదాన్ని కొలిక‌పూడి ఉద్దేశ‌పూర్వ‌కంగానే సృష్టిస్తున్నాడ‌ని అధిష్టానం పెద్ద‌లు అస‌హ‌నంగా ఉన్నారు.

ఈ నేప‌థ్యంలో తిరువూరులోని ఎమ్మెల్యే కొలికపూడి ఇంటికి ఏ.కొండూరు మండలంలోని పలు గిరిజన తండాలకు చెందిన మహిళలు గురువారం వెళ్లారు. పనుల కోసం వెళ్లేవారిని లైంగిక వాంఛ‌లు తీర్చమంటున్నాడని ర‌మేష్‌రెడ్డిపై ఎమ్మెల్యేకు ఫిర్యాదు చేశారు. మహిళలతో నీచంగా ప్రవర్తిస్తున్న రమేశ్‌రెడ్డిపై చర్యలు తీసుకోవాలని డిమాండ్‌ చేశారు. ఎమ్మెల్యే కొలికపూడి ఘాటుగా స్పందించారు. రమేశ్‌రెడ్డి లైంగిక వేధింపులపై ఇప్పటికే అధిష్ఠానానికి ఫిర్యాదు చేశాన‌ని, 48 గంటల్లో చర్యలు తీసుకోకపోతే ఎమ్మెల్యే పదవికి రాజీనామా చేస్తానని హెచ్చరించారు.

ఈ నేప‌థ్యంలో ఇవాళ (శుక్ర‌వారం) ట్విస్ట్ చోటు చేసుకుంది. తిరువూరు మాజీ ఏఎంసి చైర్మన్ అలవాల రమేష్ రెడ్డిపై ఎమ్మెల్యే కొలికపూడి అసత్య ఆరోపణలు చేస్తున్నాడ‌ని గిరిజన యువకులు, మహిళలు ఖండించారు. రమేష్‌రెడ్డి తన దగ్గరకొచ్చినా, పార్టీ కార్యక్రమాల్లో కనిపించినా చెప్పు తెగేదాకా కొడతానని ఎమ్మెల్యే వ్యాఖ్య‌ల్ని నిర‌సిస్తూ గిరిజన యువకులు ఒంటిపై పెట్రోల్ పోసుకొని ఆత్మహత్య యత్నం చేశారు. ఎమ్మెల్యే డౌన్ డౌన్ అని నినాదాలు చేశారు. తిరువూరులో ఎమ్మెల్యే ఇంటి ద‌గ్గర స‌మావేశం ఉంద‌ని, లోన్ల కోసం రావాల‌ని, డబ్బు ఇస్తామంటే వెళ్లామని గిరిజన మహిళలు చెప్పి, కొలిక‌పూడికి షాక్ ఇచ్చారు. అలాగే రమేష్ రెడ్డిపై ఆరోపణలు నిరూపించాలని ఎమ్మెల్యేను మహిళలు డిమాండ్ చేశారు.

అస‌లు తిరువూరులో ఏం జ‌రుగుతున్న‌దో, ఎందుకిలా అవుతున్న‌దో టీడీపీ అధిష్టానానికి అర్థంకాని ప‌రిస్థితి. మ‌రీ ముఖ్యంగా టీడీపీ నాయ‌కుల‌తోనే ఎమ్మెల్యేకు గొడ‌వ‌లు జ‌రుగుతున్నాయి. మ‌రీ ముఖ్యంగా కొలిక‌పూడి నోటికొచ్చిన‌ట్టు తిట్ట‌డం టీడీపీ శ్రేణుల‌కు కోపం తెప్పిస్తోంది. ర‌మేష్‌రెడ్డి వ్య‌వ‌హారంలో త‌ప్పెవ‌రిది? అలాగే 48 గంట‌ల్లో రాజీనామా చేస్తాన‌నే బ్లాక్‌మెయిల్ రాజ‌కీయాల‌కు దిగ‌డంపై టీడీపీ గుర్రుగా ఉన్న‌ట్టు తెలుస్తోంది.