సంక్రాంతి నుంచి సమ్మర్ కు..!

సంక్రాంతి బరిలో మూడేళ్ల కిందట పెద్ద హిట్ కొట్టాడు రవితేజ. దీంతో మరోసారి అతడు సంక్రాంతికొస్తాడనే ప్రచారం జరిగింది. సితార ఎంటర్ టైన్ మెంట్స్ సంస్థ కూడా ఇదే విషయాన్ని తెలిపింది. కానీ ఊహించని విధంగా రవితేజ చేతికి సర్జరీ అవ్వడంతో, అతడి సినిమా షూటింగ్ వాయిదా పడింది.

సితార ఎంటర్ టైన్ మెంట్స్ బ్యానర్ పై భాను భోగవరపు దర్శకత్వంలో రవితేజ చేస్తున్న సినిమాను సంక్రాంతికే అనుకున్నారు. కానీ ఇప్పుడీ సినిమాను సంక్రాంతికి కాకుండా సమ్మర్ కు విడుదల చేస్తున్నారు. తాజాగా టైటిల్, రిలీజ్ డేట్ ప్రకటించారు.

రవితేజ కొత్త సినిమాకు ‘మాస్ జాతర’ అనే టైటిల్ ఫిక్స్ చేశారు. ‘మనదే ఇదంతా’ అనేది ట్యాగ్ లైన్. ఈ సినిమాను వచ్చే ఏడాది మే 9న విడుదల చేయబోతున్నారు. ఫస్ట్ లుక్ పోస్టర్ లో బొడ్డులో తుపాకీ పెట్టుకొని, చేతిలో గంట వాయిస్తూ కనిపించాడు రవితేజ. బ్యాక్ గ్రౌండ్ లో జాతర వాతావరణం, బ్లాస్టింగ్ కనిపిస్తోంది.

వరుస ఫ్లాపులతో ఉన్న రవితేజ నుంచి రాబోయే చిత్రం ఇదే. ధమాకాలో రవితేజతో కలిసి నటించిన శ్రీలీల, ఇందులో మరోసారి అతడి సరసన హీరోయిన్ గా నటిస్తోంది. భీమ్స్ సంగీతం అందిస్తున్నాడు. అన్నట్టు రవితేజకు ఇది కెరీర్ లో 75వ చిత్రం.