చైతూకు రూ.100 కోట్లు ఖరీదైన గిఫ్ట్

నాగచైతన్య, బన్నీ వాస్.. ఈ కాంబినేషన్ గురించి పెద్దగా ఎవ్వరూ చెప్పుకోరు. బన్నీ వాస్ ను ఎప్పుడూ మెగా కాంపౌండ్ వ్యక్తిగానే చూస్తారు. అది నిజం కూడా. కానీ అదే సమయంలో చైతూ-వాస్ మధ్య కూడా ఓ మంచి కనెక్షన్ ఉంది.

నాగచైతన్య సినిమా ద్వారానే బన్నీ వాస్ నిర్మాతగా మారాడు. అది ఎప్పుడూ తన మనసులో అలానే ఉంటుందని అంటున్నాడు బన్నీ వాస్. అందుకే దానికి కృతజ్ఞతగా.. నాగచైతన్యకు ఓ బహుమతి ఇవ్వాలని ఫిక్స్ అయ్యాడు.

“ఎగ్జిక్యూటివ్ ప్రొడ్యూసర్, కో-ప్రొడ్యూసర్ గా ఉన్న నన్ను నిర్మాతను చేస్తానని అల్లు అరవింద్ అంటే, నన్ను యాక్సెప్ట్ చేసిన తొలి హీరో నాగచైతన్య. నిర్మాతగా నాకు కొత్త జీవితాన్నిచ్చిన నాగచైతన్యకు, తండేల్ సినిమాతో ఒక గిఫ్ట్ ఇవ్వాలనుకుంటున్నాను. ఈ సినిమాను వంద కోట్ల క్లబ్ లోకి తీసుకెళ్తాను. అదే ఆయనకు నేనిచ్చే గిఫ్ట్.”

బన్నీ వాస్ చెప్పింది చేసి చూపించాడంటే మాత్రం నాగచైతన్యకు అది అరుదైన బహుమతిగా నిలిచిపోతుంది. అటు నాగచైతన్య కూడా తండేల్ సినిమాపై కొన్ని ఆసక్తికర ప్రకటనలు చేశాడు.

తండేల్ కథ నాగచైతన్య దగ్గరకు రాలేదంట. నాగచైతన్యే తండేల్ కథ కోసం అడిగాడట. గీతా కాంపౌండ్ లో అదిరిపోయే స్టోరీ లైన్ పై వర్క్ జరుగుతుందనే విషయం తెలిసి, బన్నీ వాస్ ను నాగచైతన్యే సినిమా చేస్తానని అడిగాడంట. అలా తండేల్ కార్యరూపం దాల్చింది.