సినిమాల కంటే ప్రకటనలే ఊరిస్తున్నాయి

ఏప్రిల్ నెలలో రాబోతున్న పెద్ద సినిమాలేంటో చెప్పగలరా? చెప్పలేరు, ఎందుకంటే సమ్మర్ బాక్సాఫీస్ లో అత్యంత కీలకమైన ఏప్రిల్ లో నిజంగానే పెద్ద సినిమాలేం లేవు. రాజాసాబ్ వాయిదా పడటంతో ఏప్రిల్ బాక్సాఫీస్ వెలవెలబోవడానికి సిద్ధంగా ఉంది.

అయితే థియేటర్లలోకి రాబోతున్న సినిమాల కంటే, ఈ నెలలో మార్కెట్లోకి రాబోతున్న కొన్ని ప్రకటనలు మాత్రం అందర్నీ ఆకర్షిస్తున్నాయి. అవును.. ఏప్రిల్ నెలలో థియేటర్లలో కంటే బయటే ఎక్కువ సందడి కనిపించబోతోంది.

ఉదాహరణకు శ్రీరామనవమి అకేషన్ నే తీసుకుంటే, ఆ రోజు రామ్ చరణ్ పెద్ది గ్లింప్స్ రిలీజ్ చేయబోతున్నారు. అక్కడికి మరో 2 రోజుల్లో అల్లు అర్జున్ పుట్టినరోజు రాబోతోంది. ఆ రోజు బన్నీ-అట్లీ సినిమాను అధికారికంగా ప్రకటించబోతున్నారు.

పుష్ప-2 తర్వాత అల్లు అర్జున్ తదుపరి చిత్రం కోసం దేశం మొత్తం ఎదురుచూస్తోంది. ఆ ఉత్కంఠకు తెరదించుతూ ఏప్రిల్ 8న బన్నీ-అట్లీ సినిమాను అఫీషియల్ గా ఎనౌన్స్ చేయబోతున్నారు. ఇక అదే రోజు అల్లు అర్జున్-త్రివిక్రమ్ సినిమాను కూడా ప్రకటించాలని ‘హారిక-హాసిని’ భావిస్తోంది. అయితే దీనిపై ఇంకా స్పష్టత రాలేదు.

ఇక ఏప్రిల్ నెలలో రాజాసాబ్ టీజర్, హరిహర వీరమల్లు ట్రయిలర్ రిలీజయ్యే అవకాశాలు పుష్కలంగా ఉన్నాయి. రాజాసాబ్ టీజర్ రిలీజ్ చేసి విడుదల తేదీని ప్రకటించబోతున్నారు. ఇక మే 9 విడుదలను దృష్టిలో పెట్టుకొని హరిహర వీరమల్లు ట్రయిలర్ ను లాంఛ్ చేసే ఛాన్స్ ఉంది.

వీటితో పాటు మహేష్-రాజమౌళి సినిమాకు సంబంధించిన ప్రెస్ మీట్ కూడా ఏప్రిల్ లో జరిగే అవకాశం ఉంది. ఇంకోవైపు విశ్వంభర విడుదల తేదీ ప్రకటన, మరోవైపు ఎన్టీఆర్-ప్రశాంత్ నీల్ షూటింగ్ అప్ డేట్ కూడా ఏప్రిల్ నెలలోనే రాబోతున్నాయి. ఇలా ఏప్రిల్ లో థియేటర్లలో కంటే, మార్కెట్లోనే ఎక్కువ సందడి కనిపించబోతోంది.