‘చంద్రబాబు ఆ ఇల్లు ఖాళీ చేయండి!’

తెలుగుదేశం అధినేత చంద్రబాబు నాయుడి కరకట్ట నివాసం గురించి వైఎస్సార్ కాంగ్రెస్ పార్టీ నేతలు స్పందిస్తూ ఉన్నారు. అది ముమ్మాటికీ అక్రమ కట్టడమే అని వైఎస్సార్ కాంగ్రెస్ పార్టీ నేతలు అంటున్నారు. ఇటీవలే ఆ నిర్మాణాన్ని తన అధికారిక నివాసంగా గుర్తించి, ప్రభుత్వమే దాన్ని అద్దెకు, మెయింటెయినెన్స్ కు డబ్బులు ఇవ్వాలని చంద్రబాబు నాయుడు సీఎం జగన్ కు లేఖ రాసిన సంగతి తెలిసిందే.

ఆ కరకట్ట కట్టడం గురించి మొదటి నుంచి వైఎస్సార్ కాంగ్రెస్ పార్టీ ధ్వజమెత్తుతూనే ఉంది. నదిని పూడ్చి ఆ నిర్మాణాన్ని చేపట్టారని, దాన్ని కూల్చాలని వైఎస్సార్ కాంగ్రెస్ పార్టీ  డిమాండ్ చేస్తూ వచ్చింది. ఆ పార్టీ అధికారికంలోకి వచ్చాకా చంద్రబాబు నాయుడు దాని క్రమబద్ధీకరణ కోసం లేఖ రాశారు. అయితే దానిపై ఏ మాత్రం సానుకూలంగా స్పందించడం లేదు ప్రభుత్వం.

తాజాగా ఆ అంశం మీద వైఎస్సార్ కాంగ్రెస్ పార్టీ ఎంపీ విజయసాయి రెడ్డి స్పందించారు. ''నదులు, ప్రకృతి వనరులు చంద్రబాబుకు సొంత సంపదలా కనిపిస్తాయి. అందుకే కృష్ణానదిని పూడ్చి కట్టిన ఇంట్లో నిస్సిగ్గుగా నివాసం ఉంటున్నారు. ఏమాత్రం సామాజిక బాధ్యత ఉన్నా తక్షణం ఆ ఇంటిని ఖాళీ చేసి ఆక్రమణల తొలగింపునకు సాయపడాలి. పంచభూతాలను చెరబట్టిన నీచపు చరిత్రను మూటకట్టుకున్నారు.'' అంటూ చంద్రబాబు నాయుడి తీరుపై ఆయన ధ్వజమెత్తారు.

మొత్తానికి ఆ ఇల్లు ఖాళీ చేయాలని వైఎస్సార్ కాంగ్రెస్ పార్టీ నేతలు చంద్రబాబుకు హితబోధ చేస్తూ ఉన్నారు. ఇలాంటి నేపథ్యంలో ప్రభుత్వం నుంచి  కూడా ఆ అంశంలో అలాంటి స్పందనే వ్యక్తం అయ్యే అవకాశాలున్నాయని స్పష్టం అవుతోంది.

ఆత్మవిమర్శ అవసరం.. దిక్కుతోచని స్థితిలోనే ఈ పనులు