గంగ చెడగొడుతుందా?

గంగ సినిమా సూపర్ డూపర్ హిట్ అయిపోయింది. కానీ అది ఇచ్చిన సందేశం మరింత హిట్ అయ్యేలా వుంది. బి సి సెంటర్లను నమ్ముకుంటేనే పైసలు, లేదంటే కష్టం అన్నదే ఆ మెసేజ్. గంగ సినిమా విడుదలకు ముందే అది ఊరమాస్ గా వుంటుంది అన్న టాక్ వచ్చింది. 

అయితేనేం ఇటీవల చాలా మీడియమ్ , చిన్న తెలుగు సినిమాలకు లేనంత ఓపెనింగ్స్ ఆ సినిమాకు వచ్చాయి. సరే లోపాల సంగతి అలా వుంచితే, ఉత్తమ విలన్, దోచేయ్ వంటి  సినిమాలకు కూడా ఆ రేంజ్ ఓపెనింగ్స్ లేవు. మంచి సినిమాలు అనిపించుకున్న ఓకె బంగారం, మళ్లీ మళ్లీ ఇది రాని రోజు లాంటి వాటికీ ఈమాదిరి కలెక్షన్లు లేవు. 

అంటే సినిమా జనాలకు అందే సందేశం ఏమిటి? ఈ జనాలకు ఇలాంటి సినిమాలే కావాలి. దెయ్యమో, భూతమో, లాజిక్ వుండో, లేకపోయినా, ఊరమాస్ కామెడీ సినిమాలు తీస్తే చాలు పైసలు వస్తాయి అన్నదే కదా? అయితే మళ్లీ అలా అని వెల్లువలా ఇలాంటి సినిమాలు తీసినా, జనం ఇంటికి పంపేస్తారు. కానీ ఎటెంప్ట్ అయితే కొంతకాలం పాటు ఈ తరహా సినిమాలపై వుంటుంది. అది గ్యారంటీ.