2025 దిల్ రాజు క్యాలెండర్

ఈ ఏడాదికి సంబంధించి నిర్మాతగా దిల్ రాజు క్యాలెండర్ పూర్తయింది. అతడింకా బ్యాలెన్స్ షీట్ చూసుకున్నాడో లేదో మనకు తెలియదు కానీ, వచ్చే ఏడాది క్యాలెండర్ ను మాత్రం తాజాగా ఆవిష్కరించాడు దిల్ రాజు.

2025కు సంబంధించి సంక్రాంతి సినిమాలతో దిల్ రాజు క్యాలెండర్ మొదలు కాబోతోంది. మూడేళ్లుగా అతడు తీస్తున్న ‘గేమ్ ఛేంజర్’ సినిమా సంక్రాంతి కానుకగా జనవరి 10న విడుదల కాబోతోంది. ఈ సినిమాతోనే కొత్త ఏడాదిని మొదలుపెట్టబోతున్నాడు రాజు.

ఇదే సీజన్ లో అతడి నుంచి మరో మూవీ కూడా వస్తోంది. వెంకటేశ్ హీరోగా అనీల్ రావిపూడి దర్శకత్వంలో ‘సంక్రాంతికి వస్తున్నాం’ అనే సినిమాను కూడా విడుదల చేయబోతున్నాడు.

ఇక నితిన్ హీరోగా దిల్ రాజు నిర్మిస్తున్న తమ్ముడు సినిమా సంక్రాంతికి వస్తోంది. అటు దిల్ రాజు ప్రొడక్షన్స్ బ్యానర్ పై కొరియోగ్రాఫర్ యష్ మాస్టర్ ను హీరోగా పరిచయం చేస్తూ తీస్తున్న సినిమాను కూడా కొత్త ఏడాదిలో విడుదల చేయబోతున్నారు.

తన ఫ్యామిలీ హీరో ఆశిష్ హీరోగా తెరకెక్కిస్తున్న సెల్ఫిష్ సినిమాను ప్రస్తుతానికి హోల్డ్ లో పెట్టారు. పుష్ప-2 పనులతో బిజీగా ఉన్న సుకుమార్, ఆ సినిమా రిలీజైన తర్వాత సెల్ఫిష్ పనులను పర్యవేక్షిస్తాడు. ఈ సినిమాను కూడా 2025లో రిలీజ్ చేయబోతున్నారు.

బలగం వేణుతో ‘ఎల్లమ్మ’ అనే ప్రాజెక్టును ఫైనల్ చేశాడు దిల్ రాజు. నానితో ఈ సినిమా అనుకున్నారు కానీ కుదర్లేదు. అందుకే నితిన్ ను హీరోగా తీసుకున్నారు. 2025 దసరాకు ఈ సినిమాను రిలీజ్ చేస్తారు.

ఇలా 2025లో తన బ్యానర్స్ నుంచి రాబోయే సినిమాల లిస్ట్ బయటపెట్టాడు దిల్ రాజు. విజయ్ దేవరకొండ హీరోగా రవికిరణ్ కోలా దర్శకత్వంలో కూడా ఓ సినిమా జాబితాలో ఉన్నప్పటికీ, అది 2026లో వస్తుందని తెలిపాడు.