కొత్త మలుపు తీసుకున్న ‘మంచు’ వివాదం

కొన్ని రోజులుగా సద్దుమణిగిందనుకున్న ‘మంచు’ వివాదం, కనుమ నుంచి కాక రేపుతోంది. మోహన్ బాబు యూనివర్సిటీ ప్రాంగణంలో ఉన్న తన తాత, నాన్నమ్మ సమాధుల్ని దర్శించుకునేందుకు మంచు మనోజ్ ప్రయత్నించడంతో వివాదం మరోసారి తెరపైకొచ్చింది.

అలా తిరుపతిలో మరోసారి రాజుకున్న మంచు గొడవలు, ఇప్పుడు మరోసారి హైదరాబాద్ కు మారాయి. జల్‌పల్లిలోని తన ఆస్తులను కొందరు ఆక్రమించుకున్నారని.. సీనియర్ సిటిజన్ యాక్ట్ ప్రకారం తన ఆస్తులను తనకు ఇప్పించాలని రంగారెడ్డి జిల్లా కలెక్టర్‌కు మోహన్ బాబు ఫిర్యాదు చేశారు. జల్ పల్లిలోని తన నివాసం నుంచి మంచు మనోజ్ ను వెల్లగొట్టడం ఈ ఫిర్యాదు వెనక ఉద్దేశం.

ఫిర్యాదును పరిశీలించిన కలెక్టర్, అధికారుల ద్వారా సమాచారం తెలుసుకున్నారు. సదరు నివాసం మోహన్ బాబుదే అని గుర్తించిన కలెక్టర్, మంచు మనోజ్ కు నోటీసులు జారీచేశారు. దీనిపై చర్చించేందుకు కలెక్టర్ ఆఫీస్ కు వచ్చాడు మనోజ్. జిల్లా అదనపు కలెక్టర్ ప్రతిమా సింగ్ ను కలిసి వివరాలు తెలుసుకున్నాడు. వాళ్లు అడిగిన ప్రశ్నలకు సమాధానం ఇవ్వడంతో పాటు, తన అనుమానాల్ని కూడా నివృత్తి చేసుకున్నాడు.

బయటకొచ్చిన మనోజ్, మీడియాతో మాట్లాడాడు. “నాన్నగారిని నేను ఎప్పుడూ వ్యతిరేకించను. కేవలం నా అన్న, నాన్నను ముందుకుతోసి, వెనక నుంచి ఆడుతున్న నాటకం ఇది.” అంటూ ఆరోపించాడు. నివాసం ఖాళీ చేయమని కలెక్టర్ ఇచ్చిన నోటీసులపై లిఖితపూర్వకంగా స్పందిస్తానని, దాన్ని మీడియాకు కూడా విడుదల చేస్తానని అన్నాడు.

కొన్ని రోజులుగా మోహన్ బాబు, మంచు విష్ణు తిరుపతిలో ఉంటున్నారు. మోహన్ బాబు యూనివర్సిటీ ప్రాంగంణంలో ఉంటూ, అక్కడే సంక్రాంతి సంబరాలు జరుపుకున్నారు. జల్ పల్ నివాసం నుంచి మంచు మనోజ్ ఖాళీ చేసిన తర్వాతే మోహన్ బాబు తిరిగి అందులోకి వచ్చే అవకాశం ఉంది. ఆ నివాసం మోహన్ బాబు పేరిట ఉంది కాబట్టి, చట్టప్రకారం ఆ నివాసాన్ని ఖాళీ చేయాల్సిందేనంటూ కలెక్టర్, మంచు మనోజ్ కు స్పష్టం చేసినట్టు తెలుస్తోంది.

మరోవైపు ట్విట్టర్ లో మంచు విష్ణుకు పరోక్షంగా సవాల్ విసిరాడు మనోజ్. విస్మిత్ హ్యాష్ ట్యాగ్ తో విమర్శలు చేస్తున్న మనోజ్, మగాడిలా ప్రవర్తించాలని, దమ్ముంటే ముఖాముఖి చర్చలకు రమ్మని పిలిచాడు. తండ్రిని, స్టాఫ్ ను, మహిళల్ని అడ్డం పెట్టుకొని నాటకాలు ఆడొద్దని గట్టిగా చీవాట్లు పెట్టాడు.