ఊహించని గెటప్ లో ప్రభాస్

‘రాజాసాబ్’ సినిమాకు సంబంధించి ప్రభాస్ ఫస్ట్ లుక్ ఆల్రెడీ రిలీజైంది. అతడి లుక్ కు సంబంధించి చిన్న గ్లింప్స్ కూడా ఇదివరకే వచ్చేసింది. కాబట్టి ఆ కోణంలో ఎవ్వరూ ఆలోచించలేదు. సరిగ్గా ఇక్కడే షాకిచ్చారు ‘రాజాసాబ్’ మేకర్స్.

‘రాజాసాబ్’ లో ప్రభాస్ 2 లుక్స్ లో కనిపించబోతున్నాడు. ఇన్నాళ్లూ మనం ఒక లుక్ మాత్రమే చూశాం. ఈరోజు రెండో లుక్ రిలీజ్ చేశారు. జుట్టు, గడ్డం భారీగా పెంచాడు, అక్కడక్కడ నెరిసింది కూడా. నల్లటి వస్త్రాలు, నోటిలో సిగార్, మెడ నిండా ఆభరణాలు.. ఇలా రాజసం ఉట్టిపడే లుక్ లో ప్రభాస్ మరో లుక్ ను రివీల్ చేశారు మేకర్స్.

ప్రభాస్ పుట్టినరోజు సందర్భంగా రిలీజ్ చేసిన రాజాసాబ్ మోషన్ పోస్టర్ లో ఈ లుక్ బయటపెట్టారు. దీంతో పాటు సినిమా థీమ్ ఏంటనేది కూడా మోషన్ పోస్టర్ లో చెప్పారు. దట్టమైన అడవి, చిన్న వాగు, ఆది దాటితే భారీ భవంతి, అందులో రాజుగా ప్రభాస్ ను పరిచయం చేశారు. చూస్తుంటే, ఈ గెటప్ లో చిన్న నెగెటివ్ షేడ్ కూడా కనిపిస్తోంది.

సూపర్ నేచురల్ థ్రిల్లర్ గా, హారర్-కామెడీ ఎలిమెంట్స్ తో రాబోతోంది రాజాసాబ్ మూవీ. మారుతి డైరక్ట్ చేస్తున్న మాళవిక మోహనన్, నిధి అగర్వాల్, రిద్ది కుమార్ హీరోయిన్లుగా నటిస్తున్న ఈ సినిమాను వచ్చే ఏడాది ఏప్రిల్ 10న విడుదల చేయబోతున్నారు. మోషన్ పోస్టర్ కు తమన్ ఇచ్చిన బ్యాక్ గ్రౌండ్ స్కోర్ బాగుంది.