బాబు మార్క్ నాన్చివేత‌!

నామినేటెడ్ పోస్టుల‌ను ఇదిగో ఈ నెలాఖ‌రు లోపు భ‌ర్తీ చేస్తామ‌ని రెండు నెల‌లుగా ముఖ్య‌మంత్రి చంద్ర‌బాబునాయుడు ప్ర‌క‌టిస్తున్నారు. అయితే నెల‌లు గ‌డుస్తున్నా, నామినేటెడ్ పోస్టుల భ‌ర్తీ మాత్రం నోచుకోవ‌డం లేదు. ఇటీవ‌ల చంద్ర‌బాబునాయుడు టెలికాన్ఫ‌రెన్స్‌లో మంత్రులు, ఎమ్మెల్యేల‌తో మాట్లాడుతూ నామినేటెడ్ పోస్టుల కోసం పార్టీ కోసం ప‌ని చేసిన కార్య‌క‌ర్త‌లు, నాయ‌కుల పేర్లు ఇవ్వాల‌ని కోరారు. ఎందుకు జాప్యం చేస్తున్నార‌ని ప్ర‌శ్నించిన‌ట్టు కూడా చూశాం.

మార్చి నెలాఖ‌రు కూడా స‌మీపిస్తోంది. అయిన‌ప్ప‌టికీ నామినేటెడ్ పోస్టుల భ‌ర్తీపై ఎలాంటి ముంద‌డుగు ప‌డ‌డం లేదు. తిరుప‌తి, విజ‌య‌వాడ‌, విశాఖ‌ప‌ట్నం త‌దిత‌ర ముఖ్య న‌గ‌రాల అభివృద్ధి సంస్థ‌లకు చైర్మ‌న్ల‌ను నియ‌మించాల్సి వుంది. వీటికి ఎంతో డిమాండ్‌, పోటీ వుంది. ఈ నెలాఖ‌రుకు మార్కెట్ క‌మిటీ చైర్మ‌ను నియ‌మిస్తామ‌ని రెండు రోజుల క్రితం ఒక నాయ‌కుడు చెప్పారు. అంటే మిగిలిన పోస్టుల భ‌ర్తీ ఇప్ప‌ట్లో లేన‌ట్టేనా? అనే ప్ర‌శ్న ఉత్ప‌న్న‌మ‌వుతోంది.

ముఖ్యంగా నామినేటెడ్ పోస్టును బ‌ట్టి…కింది స్థాయి మొద‌లుకుని రాష్ట్ర‌స్థాయి ప‌ద‌వుల వ‌ర‌కూ అమ్మ‌కానికి పెట్టార‌ని కూట‌మి నేత‌లే చెబుతున్నారు. ఇప్పుడు ఇలాంటి మాట‌లు ఎవ‌రినీ పెద్ద‌గా ఆశ్చ‌ర్యప‌ర‌చడం లేదు. అధికారంలో ఉన్న‌ప్పుడు కాకుంటే, మ‌రెప్పుడు సంపాదించుకోవాల‌నే ప్ర‌శ్న ఎదుర‌వుతోంది. పార్టీకి క‌ష్ట‌ప‌డి ప‌ని చేసే వాళ్ల‌కు ప‌ద‌వుల‌నేవి కేవ‌లం మీడియా ప్ర‌క‌ట‌న‌ల‌కే ప‌రిమితం అని టీడీపీ నేత‌లు అంటున్నారు.

పార్టీ కోసం ప‌ని చేసిన ప‌ది శాతం మందికి ప‌ద‌వులు ఇచ్చి, మిగిలిన‌వ‌న్నీ అమ్మ‌కానికే అని బ‌హిరంగంగానే అంటున్నారు. ఈ విష‌యం సీఎం చంద్ర‌బాబు, మంత్రి నారా లోకేశ్‌కు కూడా తెలుస‌ని, అంద‌రూ చూసీచూడ‌న‌ట్టు వ్య‌వ‌హ‌రిస్తున్నార‌ని విమ‌ర్శిస్తున్నారు. ఇదేంట‌ని ప్ర‌శ్నించే ప‌రిస్థితిలో ఎవ‌రూ లేర‌ని అంటున్నారు. అయిన‌ప్ప‌టికీ మూడో ద‌ఫా నామినేటెడ్ పోస్టుల భ‌ర్తీకి ఎందుకింత స‌మ‌యాన్ని తీసుకుంటున్నారో అర్థం కావ‌డం లేద‌ని ప్ర‌శ్నిస్తున్నారు.