దావోస్ మాటెత్తితే గూగుల్ అంటారేంటి సార్?

దావోస్ పర్యటన ముసుగులో చంద్రబాబు నాయుడు రాష్ట్ర ప్రజలను మభ్యపెట్టే ప్రకటనలు చేయడాన్ని వైఎస్ఆర్ కాంగ్రెస్ పార్టీ తీవ్రంగా తప్పు పడుతోంది. దావోస్ అనే పేరు చెప్పి గతంలో ఏయే ప్రకటనలు చేశారో.. తమ అనుకూల మీడియాలో పతాక శీర్షికలలో ప్రకటింప చేసుకున్నారో.. ఆ పార్టీ వారు పేపర్ క్లిప్పింగులతో సహా లెక్కలు తీస్తున్నారు.

అప్పట్లో ప్రకటించిన సంస్థలేవీ సంవత్సరాలు గడిచినాసరే, ఇప్పటిదాకా రాష్ట్రానికి రానేలేదు అనే వాస్తవాలను పేపర్ క్లిప్పింగులతో సహా ప్రదర్శించి తెలుగుదేశం బూటకపు ప్రచారాలను వైసీపీ నాయకులు తిప్పికొట్టే ప్రయత్నం చేస్తున్నారు. ఆ పార్టీ మాజీ ఎమ్మెల్యే శ్రీకాంత్ రెడ్డి గతంలో చంద్రబాబు చేసిన ఒక్కొక్క దావోస్ ప్రకటనని నిశితంగా ఎత్తిచూపుతూ, ఒక్క హామీ కూడా కార్యరూపం దాల్చలేదని తేల్చి చెప్పారు.

ఆలీబాబా సహా పలు సంస్థలు రాష్ట్రానికి వచ్చయబోతున్నాయని గత తెలుగుదేశం హాయంలో చంద్రబాబునాయుడు దావోస్ కు వెళ్లి చేసిన ప్రకటనలను శ్రీకాంత్ రెడ్డి చూపిస్తున్నారు. అయితే తెలుగుదేశం పార్టీ వారికి దీనికి కౌంటర్ ఇవ్వడం కూడా సాధ్యం అవుతున్నట్లు లేదు. ప్రభుత్వం తరఫున కౌంటర్ ఇవ్వడానికి పూనుకున్న మంత్రి రాంప్రసాద్ రెడ్డి మాటల్లో ప్రభుత్వపు డొల్లతనం బయటపడిపోతోంది.

ఎలాగంటే- దావోస్2కు వెళ్లారు వచ్చారు తప్ప సాధించింది ఏమీ లేదు.. అని ప్రతిపక్షం విమర్శిస్తూ ఉండగా.. మీరు దావోస్ కి వెళ్ళిన సంగతులు మాట్లాడుతున్నారు.. గూగుల్, టిసిఎస్ సంస్థలను తీసుకొచ్చిన ఘనత మాది అంటూ మంత్రి రాంప్రసాద్ రెడ్డి కౌంటర్ ఇస్తున్నారు.

విపక్షం దావోస్ గురించి ప్రస్తావిస్తే దానితో నిమిత్తం లేకుండా జవాబు చెప్పడం చాలా చిత్రంగాను, ప్రభుత్వానికి అవమానకరంగా కూడా ఉంది. ఎందుకంటే ప్రత్యేకంగా పెట్టుబడులను ఆకర్షించడానికి అనే ఉద్దేశంతో తండ్రి కొడుకులు దావోస్ వరకు వెళ్లారు. అక్కడ అనేకమంది పారిశ్రామికవేత్తలను కలిశారు. దాని ఫలితం ఏమిటి? వీరు ఇంత కష్టపడి ఏం సాధించినట్లు? అనే అనుమానాలు ప్రజలకు రావడం అత్యంత సహజం. ఆ విషయాన్ని ప్రశ్నిస్తే బూతులు మాట్లాడినట్లుగా అధికార పార్టీ నాయకులు ఆగ్రహంగా స్పందించడం చిత్రమైన పరిణామం.

రాంప్రసాద్ రెడ్డి ప్రస్తావిస్తున్న టిసిఎస్ తో ఒప్పందం ఎప్పుడో కుదిరింది. దాని గురించి ఇప్పుడు ప్రస్తావించాల్సిన అవసరం లేదు. అలాగే విశాఖలో గూగుల్ ఏర్పాటు కావడం అనేది రాష్ట్రం సాధించిన విజయం కింద పరిగణించడానికి లేదు. అది- పెట్టుబడులన్నీ రాష్ట్ర ప్రభుత్వమే పెట్టి గూగుల్ తో నడిపిస్తున్న ఒక వ్యవహారం మాత్రమే! అలాంటప్పుడు గూగుల్ రాక గురించి మరీ అతిగా ప్రచారం చేసుకుంటే బెడిసికొట్టే అవకాశం ఉంది.

అయినా.. సింపుల్ గా గమనించినప్పుడు.. దావోస్ కు వెళ్లి ఏం సాధించారు అని ప్రశ్నిస్తోంటే.. ఇతర విషయాల గురించి మాట్లాడడం అనేది రాంప్రసాద్ రెడ్డి తమ ప్రభుత్వ వైఫల్యాలను తామే బయటపెట్టుకుంటున్నట్టుగా ఉంది.