అసెంబ్లీకి కేసీఆర్ గైర్హాజ‌ర్‌పై ఆస‌క్తిక‌ర పిటిష‌న్‌

తెలంగాణ‌లో అధికారాన్ని కోల్పోయిన బీఆర్ఎస్ అధినేత కేసీఆర్ అసెంబ్లీ స‌మావేశాల‌కు వెళ్ల‌డం లేదు. దీంతో బీఆర్ఎస్ త‌ర‌పున దీటైన వాద‌న‌ల్ని కేసీఆర్ కుమారుడు, ఆ పార్టీ వర్కింగ్ ప్రెసిడెంట్ కేటీఆర్‌, మేన‌ల్లుడైన హ‌రీష్‌రావు వినిపిస్తున్నారు. కేసీఆర్‌ను ఎలాగైనా అసెంబ్లీ స‌మావేశాల‌కు ర‌ప్పించాల‌నే ఉద్దేశంలో సీఎం రేవంత్‌రెడ్డి, మంత్రి కోమ‌టిరెడ్డి వెంక‌ట‌రెడ్డి త‌దిత‌రులు కొన్ని సంద‌ర్భాల్లో రెచ్చ‌గొట్టేలా మాట్లాడుతున్నారు.

అయిన‌ప్ప‌టికీ కేసీఆర్ మాత్రం అసెంబ్లీ స‌మావేశాల‌కు వెళ్లేందుకు స‌సేమిరా అంటున్నారు. ఈ ప‌రిస్థితిలో కేసీఆర్ అసెంబ్లీ స‌మావేశాల‌కు డుమ్మా కొట్ట‌డంపై తెలంగాణ హైకోర్టులో ఆస‌క్తిక‌ర పిటిష‌న్ దాఖ‌లైంది. కేసీఆర్ అసెంబ్లీకి వెళ్ల‌కుంటే, స్పీక‌ర్ చ‌ర్య‌లు తీసుకునేలా ఆదేశాలు ఇవ్వాల‌ని కోరుతూ ఫార్మ‌ర్స్ ఫెడ‌రేష‌న్ నాయ‌కుడు విజ‌య్‌పాల్‌రెడ్డి హైకోర్టును ఆశ్ర‌యించారు.

ఈ పిటిష‌న్ ఆస‌క్తిని రేపుతోంది. ముఖ్యంగా తెలంగాణ హైకోర్టు ఎలా స్పందిస్తుంద‌నేది ఉత్కంఠ రేపుతోంది. అసెంబ్లీకి కేసీఆర్ వెళ్ల‌క‌పోతే, పిటిష‌న్‌దారుడికి వ‌చ్చిన ఇబ్బంది ఏంట‌నేది ప్ర‌శ్న‌. ఇదంతా కాంగ్రెస్ నాయ‌కులు వెనుక ఉండి ఆడిస్తున్న నాట‌కంగా బీఆర్ఎస్ నేత‌లు విమ‌ర్శిస్తున్నారు.

కాంగ్రెస్‌లో చేరిన త‌మ ఎమ్మెల్యేల‌పై అన‌ర్హ‌త వేటు వేసేలా స్పీక‌ర్‌ను ఆదేశించాల‌ని బీఆర్ఎస్ న్యాయ పోరాటం చేస్తున్న నేప‌థ్యంలో, కౌంట‌ర్‌గా ఈ పిటిష‌న్‌ను ఆ పార్టీ చూస్తోంది.