దేవర నమ్మకం పెంచుతున్నాడు

ఎన్టీఆర్ కొరటాల కాంబినేషన్ లో వస్తున్న సినిమా ‘దేవర. విడుదల మరో అయిదు వారాల్లో వుంది. ఇప్పటికి వచ్చిన కంటెంట్ లో రెండు పాటలు కూడా వున్నాయి. వచ్చే ప్రతి కంటెంట్ ప్రామిసింగ్ గానే వుంటోంది. కానీ సినిమాకు బఙ్ ఇంకా పెరగడం లేదు.

ఇప్పుడు లేటెస్ట్ గా దేవర నుంచి విలన్ పాత్ర ఇంట్రడక్షన్ గ్లింప్స్ వదిలారు. సైఫ్ ఆలీఖాన్ పాత్ర ఎలా వుండబోతుందో అన్నది చెప్పడం మాత్రమే కాదు. సినిమా లుక్ ఎలా వుండబోతోందో అన్నది కూడా ఓ క్లారిటీ ఇచ్చారు.

సైఫ్ లుక్ కోసం విడుదల చేసిన గ్లింప్స్ పనిలో పనిగా సినిమా టోన్, లెవెల్ ఎలా వుండబోతోందో అన్నది ఓ చిన్న క్లారిటీ ఇచ్చినట్లు అయింది. దేవర భారీ సినిమా అని తెలుసు. కానీ ఆ భారీతనం చిన్న శాంపిల్ చూపించారు దర్శ‌కుడు కొరటాల. ఈ గ్లింప్స్ కు ఇచ్చిన బిజిఎమ్ కూడా బాగుంది. ఇప్పటి వరకు వచ్చిన దేవర కంటెంట్ లో ఈ టోన్, ఈ భారీ తనం అయితే లేదు.

సినిమాలోని హీరో, విలన్ పాత్రలు ఇప్పటికి బయటకు వచ్చాయి. ఈ సినిమాలో ఎన్టీఆర్ డబుల్ రోల్ అనే టాక్ వుంది. అందువల్ల ఇప్పటి వరకు బయటకు వచ్చిన ఎన్టీఆర్ లుక్ కాకుండా మరో లుక్ వుంటుంది అనుకోవాలి. బహుశా ఆ లుక్ ను సినిమాలో తప్ప వేరే విధంగా రివీల్ చేయకపోవచ్చు. ఇటు ఎన్టీఆర్ అభిమానులు, అటు కొరటాల అభిమానులు చాలా ఆసక్తిగా ఎదురుచూస్తున్న సినిమా దేవర.