పెద్ది గ్లింప్స్.. మరో వారం రోజులు

లెక్కప్రకారం ఈపాటికి ఈ సినిమా గ్లింప్స్ మార్కెట్లోకి రావాలి. కానీ సాంకేతిక సమస్యల కారణంగా చరణ్ పుట్టినరోజుకు పెద్ది గ్లింప్స్ ను విడుదల చేయలేకపోయారు. అలా వాయిదాపడిన ఈ గ్లింప్స్ రిలీజ్ కు మరో డేట్ సెట్ చేశారు.

శ్రీరామనవమి కానుకగా ఏప్రిల్ 6న పెద్ది గ్లిమ్స్ ను విడుదల చేయబోతున్నారు. చాలామంది ఉగాది కానుకగా ఈరోజు గ్లింప్స్ వస్తుందని ఎదురుచూశారు. అలాంటి వాళ్లను నిరాశ పరచకూడదనే ఉద్దేశంతో ఈరోజు గ్లింప్స్ పై క్లారిటీ ఇచ్చింది యూనిట్.

ఈ వీడియో క్లిప్ కు ‘ఫస్ట్ షాట్’ అని పేరు పెట్టారు మేకర్స్. ఇప్పటికే దీనిపై ఓ రేంజ్ లో అంచనాలు పెంచాడు నిర్మాత రవిశంకర్. సినిమాలో ఓ షాట్ ఉందని, దాని కోసం గ్లింప్స్ ను ప్రతి ఒక్కరు కనీసం వెయ్యి సార్లు చూస్తారని ఊరించాడు.

గ్లింప్స్ లో వచ్చిన ఓ ఆడియో ప్రాబ్లమ్ ను సకాలంలో టీమ్ పరిష్కరించలేకపోయింది. ఎందుకంటే, కొన్ని రోజుల కిందట ఛాతి నొప్పితో అనారోగ్యానికి గురైన ఏఆర్ రెహ్మాన్ ప్రస్తుతం బెడ్ రెస్ట్ తీసుకుంటున్నారు. ఆయన అందుబాటులోకి రావడంతో గ్లింప్స్ రెడీ అయింది.

ఈ గ్లింప్స్ కోసం అంతా ఎదురుచూడ్డానికి మరో కారణం కూడా ఉంది. 3 రోజుల కిందట రిలీజ్ చేసిన ఫస్ట్ లుక్ లో సినిమా విడుదల తేదీని ప్రకటించలేదు. గ్లింప్స్ లో సినిమా రిలీజ్ డేట్ ఎనౌన్స్ చేసే అవకాశం ఉంది.

చరణ్-బుచ్చిబాబు కాంబోలో తెరకెక్కుతున్న ఈ సినిమాలో జాన్వి కపూర్ హీరోయిన్. శివరాజ్ కుమార్, జగపతి బాబు, దివ్యేందు శర్మ కీలక పాత్రలు పోషిస్తున్నారు.