అక్కడేం లేదు, కానీ ఎదురుచూశారు

“ప్రభాస్ పుట్టినరోజు నాడు బ్యాక్ టు బ్యాక్ అప్ డేట్స్ తో పండగ చేసుకోవచ్చు.” అతడి ఫ్యాన్స్ ఇదే ఎదురుచూశారు. నిజానికి అక్కడ అంత లేదనే విషయం తెలుసు. కానీ అభిమానం, ఉబలాటం వాళ్లను అలా నిరీక్షించేలా చేశాయి. మొత్తానికి ప్రభాస్ బర్త్ డే వేడుకలు ముగిశాయి. రాజా సాబ్ మాత్రమే మెరిసింది.

పుట్టినరోజు సందర్భంగా ప్రభాస్, హను రాఘవపూడి సినిమా నుంచి అప్ డేట్ వస్తుందని అతడి ఫ్యాన్స్ ఆశపడ్డారు. మరీ ముఖ్యంగా ఈ సినిమాకు ‘ఫౌజీ’ అనే టైటిల్ అనుకుంటున్నారు కాబట్టి, ఆ టైటిల్ ను ప్రకటిస్తారని అనుకున్నారు. కానీ అలాంటిదేం జరగలేదు.

నిన్న ఉదయం నుంచి సాయంత్రం వరకు అభిమానుల్ని ఎదురుచూసేలా చేసి, చివరికి ఏం లేదని తేల్చేసింది ‘మైత్రీ’. ప్రస్తుతానికి ‘రాజాసాబ్’ మోషన్ పోస్టర్ తో సెలబ్రేట్ చేసుకుందామని, మరో రోజున తమ సినిమా అప్ డేట్ ఇస్తామని ప్రకటించి చేతులు దులుపుకుంది.

అటు సలార్-2, కల్కి-2 విషయంలో కూడా ఇదే జరిగింది. ఈ రెండు సినిమాల్లో కనీసం ఒక సినిమా నుంచైనా షూటింగ్ అప్ డేట్ వస్తుందని ప్రభాస్ ఫ్యాన్స్ వెయిట్ చేశారు. కానీ వాళ్లకు ఎదురుచూపులు మాత్రమే మిగిలాయి.

త్వరలోనే సెట్స్ పైకి రానున్న ‘స్పిరిట్’ సినిమా నుంచి కూడా కొత్త విషయాలేం బయటకురాలేదు. దీంతో ప్రభాస్ అభిమానులు తమ ఆనందాన్ని ‘రాజాసాబ్’ వరకు మాత్రమే పరిమితం చేసుకున్నారు. మిగతా అప్ డేట్స్ కోసం ఎప్పట్లానే మరోసారి ఎదురుచూపులు మొదలుపెట్టారు.