వీకెండ్ వరకు కూడా ఆగేలా లేదు

దీపావళికి రిలీజైన 3 సినిమాలూ హిట్టయ్యాయి. దిల్ రాజు లాంటి అనుభవజ్ఞుడైన నిర్మాత సైతం ఆశ్చర్యపోయే పరిస్థితి. తన 30 ఏళ్ల కెరీర్ లో ఎప్పుడూ ఇలాంటి సందర్భం చూడలేదన్నాడాయన. అయితే ఆ ఊపు మళ్లీ కనిపించలేదు. దీపావళి తర్వాత రిలీజైన 3 సినిమాలూ ఫ్లాప్ అయ్యాయి.

నిఖిల్ నటించిన ‘అప్పుడో ఇప్పుడో ఎప్పుడో‘ సినిమా రిలీజైనట్టు కూడా ఎవ్వరికీ తెలియదు. ప్రచారం లేకపోయినా మౌత్ టాక్ తో తమ సినిమా నిలబడుతుందని మేకర్స్ గొప్పగా చెప్పినప్పటికీ, అక్కడ అంత సీన్ లేదు. రిలీజైన రోజే ఫ్లాప్ అయిన సినిమా ఇది.

ఇక ఈ వారం మట్కా, కంగువా సినిమాలు థియేటర్లలోకి వచ్చాయి. వీటిలో కనీసం ఒక్క సినిమానైనా నిలబడుతుందని ట్రేడ్ భావించింది. కానీ రెండూ డ్రాప్ అయ్యాయి. ఎంతలా అంటే, ఈ వీకెండ్ వరకు కూడా నిలబడేలా లేవు.

వరుణ్ తేజ్ కు మట్కా రూపంలో మరో ఫ్లాప్ వచ్చిపడింది. వారాంతం కూడా పూర్తికాకుండానే సినిమా జాతకం తేలిపోయింది. శుక్రవారం ఈ సినిమా థియేట్రికల్ రన్ ఘోరం. ఈరోజు పరిస్థితి అంతకంటే దారుణం. హైదరాబాద్, వరంగల్, విజయవాడ, తిరుపతి, విశాఖపట్నం అనే తేడా లేకుండా అన్ని ప్రాంతాల్లో ఫ్లాట్ గా మారింది.

అటు కంగువా సినిమాది కూడా సేమ్ సీన్. రిలీజ్ రోజు నైజాంలో థియేటర్లు దొరక్క ఇబ్బంది పడింది ఈ సినిమా. ఇప్పుడీ సినిమాకు స్క్రీన్ కౌంట్ పెరిగింది కానీ ఇప్పటికే జరగాల్సిన నష్టం జరిగిపోయింది. అటు ఏపీలో కూడా పరిస్థితి ఆశాజనకంగా కనిపించడం లేదు.

ఇలా దీపావళి తర్వాతొచ్చిన 3 సినిమాలు వేటికవే నిరాశపరిచాయి. వచ్చే వారం 4 సినిమాలు రాబోతున్నాయి. వీటిలో విశ్వక్ సేన్ మెకానిక్ రాకీ, సత్యదేవ్ జీబ్రా సినిమాలున్నాయి.