కష్టాలు చెప్పుకునే హక్కు కూడా లేదా?

చంద్రబాబునాయుడు మంగళవారం నాడు తన కుప్పం పర్యటనలో ‘జననాయకుడు’ అనే పోర్టల్ ను ప్రారంభించారు. ప్రజలు తమ ఎమ్మెల్యే లేదా, ఎంపీలకు తమ ఇబ్బందులు, కష్టాలు, సమస్యలు చెప్పుకునే ఆన్ లైన్ పోర్టల్ ఇది. కుప్పం తెలుగుదేశం కార్యాలయంలో ఆయన ఈ పోర్టల్ ను ప్రారంభించారు.

నిజానికి ఇది చాలా మంచి ఏర్పాటు. నియోజకవర్గంలో ప్రజలు ఎవరైనా సరే.. పార్టీ కార్యాలయానికి వచ్చి అక్కడి కౌంటర్లనుంచి తమ సమస్యలను పోర్టల్ ద్వారా ప్రభుత్వం దృష్టికి తీసుకువెళ్లడానికి ఈ పోర్టల్ ఉపయోగపడుతుంది. ఫిర్యాదులు రిజిస్టర్ చేయడం మాత్రమే కాదు. వాట్సప్ ద్వారా కూడా సమాచారం ఇవ్వడానికి వెసులుబాటు కల్పించారు.

అయితే ఈ పోర్టల్ తెలుగుదేశం పార్టీ తరఫున నిర్వహిస్తున్న పోర్టల్ లాగా కనిపిస్తోంది. చంద్రబాబునాయుడు ఎన్నికల సమయంలో మాత్రమే తెలుగుదేశం పార్టీ అధినేత. గెలిచి, ముఖ్యమంత్రి అయిన తర్వాత.. యావత్ రాష్ట్ర ప్రజలకు ఆయన నాయకుడు కదా? ఏ నియోజకవర్గంలో ఏ పార్టీ ఎమ్మెల్యే ఉన్నారనే దానితో నిమిత్తం లేకుండా.. అన్నిచోట్లా ప్రజలు తమ కష్టాలు చెప్పుకునే అవకాశం కల్పించి ఉంటే బాగుండేది కదా..? అనేది ప్రజల సందేహంగా ఉంది.

బహుశా ఈ పోర్టల్ లో వైసీపీ ఎమ్మెల్యేలు ఉండే నియోజకవర్గాల ప్రజలు కూడా రిజిస్టరు చేసుకునే అవకాశం ఉండవచ్చు. కానీ, ఒకసారి రిజిస్టరు చేసిన తర్వాత.. ఆ పని కోసం వారు తెలుగుదేశం నేతల చుట్టూనే తిరుగుతూ ఉండాల్సి వస్తుంది.

ఇలాంటి మంచి ఏర్పాటును, ఆలోచనను తెలుగుదేశం పార్టీ తరఫున కాకుండా.. ప్రభుత్వం తరఫున మొత్తం 175 నియోజకవర్గాలకు అమల్లోకి తీసుకువచ్చే ఆలోచన చంద్రబాబు ఎందుకు చేయడం అని ప్రజలు ఆశ్చర్యపోతున్నారు.

పార్టీ వ్యవహారాలు, పార్టీ కార్యకర్తల సమస్యలు తెలుసుకోవడానికి కావలిస్తే.. పార్టీ తరఫున సెపరేట్ పోర్టల్ నడుపుకోవచ్చునని.. కష్టాలు, కన్నీళ్లు చెప్పుకునే పోర్టల్ రాష్ట్రంలోని అన్ని నియోజకవర్గాల వారికి సమానంగా అవకాశం ఇవ్వాలి కదా.. ప్రభుత్వం తరఫున దానిని నిర్వహిస్తే ఆటోమేటిగ్గా అధికారుల్లో కూడా జవాబుదారీతనం ఉంటుంది కదా.. అని పలువురు వ్యాఖ్యానిస్తున్నారు.