టీడీపీ నేత‌ల దోపిడీపై ఈనాడు క‌న్నెర్ర‌

టీడీపీ ప్ర‌జాప్ర‌తినిధుల దోపిడీపై ముఖ్య‌మంత్రి చంద్ర‌బాబునాయుడి రాజ‌గురువు ప‌త్రిక ఈనాడు క‌న్నెర్ర చేసింది. ఇసుక‌, మ‌ద్యం వ్యాపారాల్లో టీడీపీ నేత‌లెవ‌రూ త‌ల‌దూర్చొద్ద‌ని చెబుతున్నా, వాళ్లు మాత్రం ప‌ట్టించుకోవ‌డం లేద‌ని ఆ క‌థ‌నంలో వాపోవ‌డాన్ని చూడొచ్చు. చంద్ర‌బాబు హెచ్చ‌రిక‌ల‌కు పూర్తి విరుద్ధంగా అనంత‌పురం నుంచి శ్రీ‌కాకుళం వ‌ర‌కూ ముఖ్యంగా మ‌ద్యం దుకాణాల విష‌యంలో దోపిడీకి పాల్ప‌డుతున్నారంటూ స‌మ‌గ్ర క‌థ‌నం రాసింది.

టీడీపీ కేంద్ర కార్యాల‌యంలో శుక్ర‌వారం నిర్వ‌హించిన స‌మావేశంలో చంద్ర‌బాబు ఏమ‌న్నారో తెలుసుకుందాం.

“పార్టీ నేత‌లెవ‌రూ విచ్చ‌ల‌విడిగా ప్ర‌వ‌ర్తించొద్దు. ఇసుక , మ‌ద్యం వంటి అంశాల్లో త‌ల‌దూర్చొద్దు. వైసీపీ వాళ్లు చేసిన‌ట్టుగా త‌ప్పులు చేయ‌వ‌ద్దు. ప్రజ‌ల న‌మ్మ‌కాన్ని నిల‌బెట్టాలి. ఈ నాలుగు నెల‌ల్లో మీ ప‌నితీరుకు సంబంధించిన ప్రోగ్రెస్ రిపోర్ట్ నా ద‌గ్గ‌ర వుంది. ఫీల్ గుడ్ ఫ్యాక్ట‌ర్ లేకుండా డ‌బ్బుల‌తో ఏ ఎన్నిక‌ల్లోనూ గెల‌వ‌లేరు. డ‌బ్బే ప్ర‌ధాన‌మైతే మ‌న‌కు 93 శాతం విజ‌యం ద‌క్కేది కాదు. మాగుంట కుటుంబం లిక్క‌ర్ వ్యాపారంలో వార‌స‌త్వంగా వుంది. అలాంటి వాళ్ల వ‌ర‌కు స‌రేకానీ, కొత్త‌వాళ్లు ఇందులో దిగాల‌ని అనుకుంటే మాత్రం పార్టీ ప్ర‌తిష్ట పోతుంది. ఈ ఎన్నిక‌ల్లో గెలిచాం కాబ‌ట్టి.. చాల‌నుకుంటే కుద‌ర‌దు” అని చంద్ర‌బాబు స్ప‌ష్టం చేశారు.

ఈనాడు ప‌త్రిక‌లో కూట‌మి నేత‌ల దౌర్జ‌న్యాల‌పై ఏం రాశారో చూద్దాం.

“నియోజ‌క‌వ‌ర్గాల‌ను త‌మ సామ్రాజ్యాలుగా కొంద‌రు ఎమ్మెల్యేలు వ్య‌వ‌హ‌రిస్తున్నారు. లాట‌రీలో మ‌ద్యం దుకాణాల లైసెన్స్‌లు ఎవ‌రికొస్తే మాకేంటి? మా ఇలాకాలో మేమే వ్యాపారం నిర్వ‌హిస్తాం. మీకు కావాలంటే ఎంతోకొంత సొమ్ము ఇస్తాం. వ‌దిలేసి వెళ్లిపోండి అంటూ కొంద‌రు బెదిరింపుల‌కు పాల్ప‌డుతున్నారు. మీరేం చేసుకుంటారో మాకు అన‌వ‌స‌రం. ప్ర‌తి నెలా మాకు క‌ప్పం క‌ట్టాల్సిందే అంటూ ఇంకొంద‌రు ఎమ్మెల్యేలు హెచ్చ‌రిస్తున్నారు. శ్రీ‌కాకుళం నుంచి అనంత‌పురం వ‌ర‌కూ ఇదే ప‌రిస్థితి. ఈ నాయ‌కుల దెబ్బ‌కు కొంత‌మంది దుకాణాలు తెరవడానికి భ‌య‌ప‌డిపోతున్నారు”

ఈ క‌థ‌నంలో ఎక్కడెక్క‌డ ఏ ర‌కంగా బెదిరింపుల‌కు పాల్ప‌డుతున్నారో వివ‌రించారు. ఆదాయం విష‌యంలో చంద్ర‌బాబు బెదిరింపుల‌కు పాల్ప‌డే ప‌రిస్థితి ఏ మాత్రం లేదు. ఇది కేవ‌లం ఆరంభం మాత్ర‌మే. ఇంకా నాలుగున్న‌రేళ్ల పాటు కూట‌మి అధికారంలో వుండ‌నుంది. ఇంకా ఎన్నెన్ని చూడాల్సి వ‌స్తుందో అనే చ‌ర్చ‌కు తెర‌లేచింది. దీపం వుండ‌గానే ఇల్లు చ‌క్క‌దిద్దుకోవాల‌నే ఆలోచ‌న త‌ప్ప‌, మంచీచెడ్డ‌ల గురించి ఆలోచించే నాయ‌కులెవ‌రూ లేక‌పోవ‌డం గ‌మ‌నార్హం.