రాజ‌మౌళి కంటే అద్భుతంగా… !

ద‌ర్శ‌కుడు రాజ‌మౌళి కంటే పోలీసులు అద్భుతంగా క‌థ‌లు అల్లుతున్నార‌ని బీఆర్ఎస్ వ‌ర్కింగ్ ప్రెసిడెంట్‌, మాజీ మంత్రి కేటీఆర్ సెటైర్స్ విసిరారు. ఫార్ములా ఈ-రేస్ కేసులో ఏసీబీ విచార‌ణ‌కు కేటీఆర్ వెళ్లారు. ఈ సంద‌ర్భంగా హైడ్రామా న‌డిచింది. కేటీఆర్ త‌న వెంట తీసుకెళ్లిన లాయ‌ర్‌ను పోలీసులు లోప‌లికి అనుమ‌తించ‌లేదు. దీంతో కేటీఆర్ ఆగ్ర‌హం వ్య‌క్తం చేశారు.

త‌న లాయ‌ర్‌ను ఏసీబీ కార్యాల‌యంలోకి అనుమ‌తిస్తార‌ని ఎదురు చూసిన కేటీఆర్‌కు చివ‌రికి నిరాశే ఎదురైంది. దీంతో ఆయ‌న వెనుతిరిగి వెళుతూ మీడియాతో మాట్లాడారు. లాయ‌ర్‌తో విచార‌ణ‌కు హాజ‌ర‌వుతుంటే పోలీసుల‌కు వ‌చ్చిన ఇబ్బంది ఏంట‌ని ఆయ‌న ప్ర‌శ్నించారు. పోలీసుల‌పై త‌న‌కు న‌మ్మ‌కం లేద‌ని కేటీఆర్ తేల్చి చెప్పారు. లాయ‌రే త‌న‌కు ర‌క్ష అన్నారాయ‌న‌.

లాయ‌ర్ల స‌మ‌క్షంలో విచారిస్తామ‌ని చెబితే, తాను కార్యాల‌యం లోప‌ల‌కి వెళ్తాన‌న్నారు. ఈ సంద‌ర్భంగా పోలీసుల‌కు ఆయ‌న చుర‌క‌లు అంటించారు. రాజ‌మౌళి కంటే గొప్ప‌గా పోలీసులు క‌థ‌లు రాస్తున్నార‌ని వెట‌క‌రించారు.

ఈ నేప‌థ్యంలో ఎట్టి ప‌రిస్థితుల్లోనూ లాయ‌ర్‌ను అనుమ‌తించేది లేద‌ని ఏసీబీ అధికారులు స్ప‌ష్టం చేశారు. మ‌రోసారి కేటీఆర్‌కు నోటీసు ఇవ్వ‌డానికి ఏసీబీ అధికారులు నిర్ణ‌యించారు. లాయ‌ర్ రాకుండా రావాల‌ని ఆ నోటీసులో పేర్కొన‌నున్నారు. ఇదిలా వుండ‌గా ఈడీ విచార‌ణ‌కు మంగ‌ళ‌వారం కేటీఆర్ హాజ‌రు కావాల్సి వుంది. వెళ్తారో, లేదో చూడాలి.