మార్కులు సరే.. ర్యాంకులు కూడా తెప్పించగలరా లోకేష్ బాబూ!

ప్రభుత్వ నిర్వహణలోని కళాశాలలు, స్కూళ్లు విద్యాసంస్థల్లో చదువుకుంటూ అత్యుత్తమ మార్కులు సాధించిన 53 మంది టాపర్లకు ‘షైనింగ్ స్టార్స్ 2025’ పేరుతో విద్యాశాఖ మంత్రి నారా లోకేష్ ప్రత్యేకంగా ఒక సత్కార కార్యక్రమాన్ని ఏర్పాటుచేశారు. ప్రభుత్వ విద్యాసంస్థల్లో చదివేవారికి మార్కులు రావు అనే ముద్రను మీరు చెరిపేశారు అంటూ ఆయన వారిని ప్రత్యేకంగా అభినందించారు. ఈ 52 మంది టాపర్లకు బంగారుపతకాలు, లాప్ టాప్ లు అందజేశారు.

52లో 43 మంది అమ్మాయిలే కావడం విశేషం. సర్కారీ విద్యాసంస్థలు అంటే కేవలం నిరుపేదలు మాత్రమే చదువుకునే సంస్థలుగా ముద్రపడిపోయింది. ఈ నేపథ్యంలో పేద కుటుంబాల నుంచి మంచి మార్కులు తెచ్చుకున్న వారిని సత్కరించి ప్రోత్సహిస్తున్నందుకు లోకేష్ ను కూడా అభినందించాలి.

అయితే ఈ కారణం చేత విద్యావ్యవస్థలో ఉన్న లొసుగులను, లోపాలను విస్మరించలేము. ప్రభుత్వ విద్యాసంస్థల్లో నూరుశాతం పాస్, టాప్ గ్రేడ్ మార్కులు రావడం గురించి ప్రభుత్వ ఆయా సంస్థలను వెంటాడుతోంది. ఇలాంటి పరిస్థితుల్లో పబ్లిక్ పరీక్షలు జరుగుతున్నప్పుడు మాస్ కాపీయింగ్ లను ప్రోత్సహించడం అనేది సర్వసాధారణం అయిపోయింది. పిల్లలకు పుస్తకాలు ఇచ్చి రాయిస్తున్న ప్రభుత్వ కాలేజీలు, స్కూళ్లు కూడా ఉన్నాయి.

ఎన్ని అడ్డదారులైనా తొక్కు.. పిల్లలందరూ పాస్ కావాలి.. వాళ్లకు మంచి మార్కులు రావాలి.. అనే ఒత్తిడి ఒక్కటే టీచర్ల మీద కనిపిస్తోంది. ఇలాంటి పోకడల వలన తప్పుడు పనులు చేసైనా సరే.. నెగ్గుకు రావడం మాత్రమే ముఖ్యం అనే ధోరణిలోకి స్టూడెంట్స్ పతనం అయిపోతున్నారు.

ప్రభుత్వ కాలేజీల్లో చదివిన వారికి మార్కలు దండిగా వచ్చాయని మురిసిపోతున్న నారా లోకేష్.. ఎంసెట్, ఐఐటీ, నీట్ వంటి ఎంట్రెన్సు పరీక్షలకు ప్రభుత్వ కళాశాలల లెక్చరర్లతోనే కనీసం జిల్లాకు ఒక ప్రత్యేక కోచింగ్ సెంటరును ఏర్పాటుచేయగలరా? ఈ మార్కులు ఎక్కువ వచ్చరే పేద పిల్లలకు ఆ కోచింగ్ సెంటర్లలో తర్ఫీదు ఇచ్చి.. వారికి మంచి ర్యాంకులు వచ్చేలా చేయగలరా అనే సవాళ్లు ఎదురవుతున్నాయి. అది సాధ్యం కాదు.

ఎందుకంటే.. పబ్లిక్ పరీక్షల్లో మాస్ కాపీయింగ్ చేయించినట్టుగా.. ఎంట్రెన్సు టెస్టుల్లో ప్రభుత్వ కాలేజీల్లో చదివిన వారితో మాత్రం కాపీయింగ్ చేయించడం అనేది కుదరదు. వీటన్నింటినీ మించి.. ఆ ప్రయత్నాన్ని సక్సెస్ ఫుల్ గా నడిపితే.. తమకు ఆర్థికంగా అండగా ఉండే ప్రెవేటు కోచింగ్ సెంటరు సంస్థలు ఆగ్రహిస్తాయని నాయకులే పట్టించుకోరు.

మంచి మార్కులు తెచ్చుకున్న విద్యార్థులను అవమానించడం కాదు గానీ.. ఈ మార్కుల, నూరుశాతం పాస్ ఒత్తిడి వలన విద్యావ్యవస్థ భ్రష్టు పట్టిపోతున్నదనే సంగతిని ఒప్పుకోవాలి. వ్యవస్థకు అలాంటి ఒత్తిడి చేస్తున్న గాయాల మీద.. ఇలాంటి సత్కారాల రూపంలో ముసుగులు వేసేసి బాహ్య ప్రపంచాన్ని మభ్యపెడుతున్నారని కూడా అనుమానించాలి.