రాష్ట్ర‌మంతా టీడీపీదే అధికారం.. అక్క‌డ త‌ప్ప‌!

ఆంధ్ర‌ప్ర‌దేశ్‌లో కూట‌మి అధికారంలో వుంది. కూట‌మికి టీడీపీ నాయ‌క‌త్వం వ‌హిస్తోంది. కూట‌మిలో టీడీపీ, జ‌న‌సేన‌, బీజేపీ ఉన్నాయి. ఆంధ్ర‌ప్ర‌దేశ్ వ్యాప్తంగా ప్ర‌ధానంగా టీడీపీ అధికారాన్ని చెలాయిస్తోంది. అయితే కాకినాడ జిల్లా పిఠాపురంలో మాత్రం టీడీపీ కార్య‌క‌ర్త‌లు, నాయ‌కులు ఇంకా తాము ప్ర‌తిప‌క్షంలో ఉన్న‌ట్టే ఆవేద‌న చెందుతున్నారు.

కూట‌మి అధికారంలో లేక‌పోయి వుంటే, వాళ్లు బాధ‌ప‌డేవాళ్లు కాదు. కానీ ప్ర‌భుత్వంలో పెద్ద‌న్న పాత్ర పోషిస్తూ, పిఠాపురంలో మాత్రం త‌మ మాట చెల్లుబాటు కాక‌పోవ‌డాన్ని నియోజ‌క‌వ‌ర్గ ఇన్‌చార్జ్ వ‌ర్మ మొద‌లుకుని, గ్రామ‌స్థాయి కార్య‌క‌ర్త వ‌ర‌కూ ఆవేద‌న చెందుతున్నారు. పిఠాపురం నియోజ‌క‌వ‌ర్గంలో ఏ ప్ర‌భుత్వ కార్యాల‌యంలోనూ టీడీపీ అని పోతే ప‌నులు జ‌ర‌గ‌క‌పోగా, అంతా రివ‌ర్స్ అవుతోందని స‌మాచారం.

ఇటీవ‌ల ఇంటి స్థ‌లాల్ని కాకినాడ వాళ్ల‌కు ఇవ్వ‌డం కుద‌ర‌ద‌ని, గ‌తంలో వైసీపీ హ‌యాంలో ఇచ్చిన వాటిని ర‌ద్దు చేస్తామ‌ని వ‌ర్మ హెచ్చ‌రించిన సంగ‌తి తెలిసిందే. అయితే అలాంటిదేమీ లేద‌ని రెవెన్యూ అధికారి ప్ర‌క‌ట‌న ఇచ్చారు. దీంతో వ‌ర్మకు గాలి తీసిన‌ట్టైంది. పిఠాపురంలో పారిశుధ్యం అధ్వానంగా వుంద‌ని, వెంట‌నే చ‌ర్య‌లు చేప‌ట్టాల‌ని కాకినాడ క‌లెక్ట‌ర్‌కు వ‌ర్మ విన‌తిప‌త్రం ఇచ్చారు. కానీ వ‌ర్మ‌ను క‌లెక్ట‌ర్ పెద్ద‌గా ప‌ట్టించుకోలేద‌ని ఆయ‌న అనుచ‌రులు అంటున్నారు.

అలాగే పోలీస్ అధికారుల‌కు స్ప‌ష్ట‌మైన ఆదేశాలు వ‌చ్చిన‌ట్టు స‌మాచారం. వ‌ర్మ లేదా టీడీపీ నాయ‌కులెవ‌రైనా పోలీస్‌స్టేష‌న్ల‌కు వెళ్లి అజ‌మాయిషీ చేయాల‌ని చూస్తే, వాళ్ల‌ను అస‌లు ప‌ట్టించుకోవ‌ద్ద‌ని స్ప‌ష్ట‌మైన మౌఖిక ఆదేశాలున్న‌ట్టు విశ్వ‌స‌నీయ స‌మాచారం. ఇక త‌హ‌శీల్దార్, ఎంపీడీవో కార్యాల‌యాల‌కు వెళ్లి, ప‌నులు చేయాల‌ని టీడీపీ శ్రేణులు అడిగే ప‌రిస్థితి లేద‌ని అంటున్నారు. ఏ ర‌కంగా చూసినా వ‌ర్మ‌ను జ‌న‌సేన నాయ‌కులు ప్ర‌త్య‌ర్థిగానే చూస్తున్నారు.

వైసీపీ వాళ్ల కంటే, టీడీపీ శ్రేణుల్నే త‌మ ప్ర‌త్య‌ర్థులుగా భావించి, ప‌నులేవీ జ‌ర‌గ‌కుండా జ‌న‌సేన ఎక్క‌డిక‌క్క‌డ అడ్డుక‌ట్ట వేస్తుండ‌డం చ‌ర్చ‌నీయాంశ‌మైంది. అందుకే పిఠాపురంలో టీడీపీ కార్య‌క‌ర్త‌లు, నాయ‌కులు తామింకా ప్ర‌తిప‌క్షంలో ఉన్న‌ట్టుగానే భావిస్తూ, డిప్యూటీ సీఎం ప‌వ‌న్‌క‌ల్యాణ్ మొద‌లుకుని, జ‌న‌సేన నాయ‌కుల‌పై ర‌గిలిపోతున్నార‌ని స‌మాచారం.