కొండెక్కిన బంగారం.. కొనాలా.. వెయిట్ చేయాలా?

బంగారం లక్ష రూపాయలకు చేరింది. అది మేలిమి బంగారమా, ఆర్నమెంట్ బంగారమా అనేది అప్రస్తుతం. 10 గ్రాముల బంగారం కొనాలని మీరు షాప్ కు వెళ్తే కచ్చితంగా లక్ష రూపాయల బిల్లు పడుతుంది. బంగారం షాపుల్లో ఉండే తరుగు, మజూరీ లాంటి లెక్కల గురించి అందరికీ తెలిసిందే. దానికి తోడు జీఎస్టీ ఉండనే ఉంది.

కాబట్టి చేతిలో లక్ష లేకుండా బంగారం షాపులో అడుగుపెట్టే పరిస్థితి లేదిప్పుడు. రాబోయే రోజుల్లో గోల్డ్ రేటు మరింత పెరుగుతుందనే అంచనాల నేపథ్యంలో, అసలు ఇప్పుడున్న పరిస్థితుల్లో బంగారం కొనడం ఉత్తమమా లేక మరికొన్ని రోజులు వెయిట్ చేస్తే మంచిదా?

చాలామంది విశ్లేషకులు/నిపుణులు చెబుతున్న మాట ఏంటంటే, పెట్టుబడి లక్ష్యంతో బంగారాన్ని కొనాలని చూసేవాళ్లు మాత్రం ఎదురుచూడడం మంచిది. ఏవైనా శుభకార్యాలు పెట్టుకొని బంగారం కొనాలనుకునేవాళ్లు మాత్రం తక్షణం కొనడం ఉత్తమం. ఎందుకంటే, రాబోయే రోజుల్లో బంగారం మరో 10వేల రూపాయలు పెరగొచ్చనేది వీళ్ల అంచనా.

మరి భవిష్యత్తులో బంగారం ధరలు పెరుగుతాయా.. ఇవే రేట్లతో స్థిరీకరణ పొందుతాయా? రాబోయే రోజుల్లో బంగారం ధరలు తగ్గొచ్చని చెబుతున్నారు వీళ్లు. ట్రంప్ తీసుకుంటున్న నిర్ణయాల వల్ల ప్రస్తుతం ప్రపంచ మార్కెట్లలో అనిశ్చితి కొనసాగుతోందని, కాబట్టి కొన్నాళ్లు వెయిట్ చేస్తే గోల్డ్ రేటు కచ్చితంగా తగ్గే అవకాశం ఉందని అంటున్నారు.

ప్రస్తుతం అమెరికా ఉపాధ్యక్షుడు ఇండియాలో పర్యటిస్తున్నారు. మరోవైపు భారత అధికారుల బృందం అమెరికా అధికారులతో సుంకాలపై చర్చిస్తోంది. అమెరికా నుంచి సానుకూల సంకేతాలు వస్తున్నాయి. ఇదే కనుక నిజమైతే, బంగారం ధర 90వేల రూపాయలకు దిగుతుందని అంచనా వేస్తున్నారు.

పన్నుల యుద్ధం కొలిక్కి వచ్చేంతవరకు బంగారం ధరలపై ఎవ్వరూ ఏం చెప్పలేరని అంటున్నారు నిపుణులు. ప్రస్తుతం ట్రంప్ కు వ్యతిరేకంగా అమెరికన్లు రోడ్డెక్కుతున్నారని, ట్రంప్ కాస్త చల్లారితే, ప్రపంచవ్యాప్తంగా వాణిజ్య పరిస్థితులు కూడా చక్కబడతాయని విశ్లేషిస్తున్నారు.

నిజానికి ధరలు తగ్గినా, పెరిగినా వస్తురూపంలో బంగారం కొనడం అనేది డెడ్ ఇన్వెస్టిమెంట్. ఫంక్షన్లకు వేసుకెళ్లడానికి లేదా గోల్డ్ లోన్ కోసం మాత్రమే పనికొస్తుంది. నిజంగా బంగారంపై పెట్టుబడి పెట్టాలనుకుంటే ఫిజికల్ గోల్డ్ కొనకూడదు. ఈ తేడాను గమనించి బంగారంపై డబ్బు పెట్టాలని సూచిస్తున్నారు గోల్డ్ మార్కెట్ ఎనలిస్టులు. ప్రస్తుతానికైతే మధ్యతరగతి జనం బంగారం షాపులకు పూర్తిగా దూరమయ్యారు. తెలుగు రాష్ట్రాల్లో సేల్స్ తగ్గాయని బంగారం షాపుల యజమానులు చెబుతున్నారు.