Epaper
ఎగురుతోంది చూడరా మువ్వన్నెల జెండా
వంద కోట్ల అవని జనులు మన గుండెల నిండా
జాతి ఘనత ప్రతీకగా అదే మనకు అండ
ఎగురుతోంది చూడరా మువ్వన్నెల జెండా
కొత్త చేతులలోన భవితను
మనదు జాతి కొలువు దీర్ప
అవినీతి రూపుమాయుననే ఆశలు చిగుళ్లు తొడగగ
ఎగురుతోంది చూడరా మువ్వన్నెల జెండా
తెలుగుజాతి తొలిసారిగ
రెండు చోట్ల ఎగరేయగ
విడిపోయీ కలిసుండే నవీన రీతికి సాక్షిగ
ఎగురుతోంది చూడరా మువ్వన్నెల జెండా
తల్లి వేరు వరకు కుళ్లి
రాజకీయమంత కునారిల్ల
పరిశుద్ధాత్మల సాక్షిగ ప్రక్షాళన లక్ష్యముగా
ఎగురుతోంది చూడరా మువ్వన్నెల జెండా
అడుగడుగున ఆడబతుకు
కీచక పర్వం పాలవుతోంటే..
దుర్మార్గుల దునుమాడే నవజాతిని కాంక్షిస్తూ
ఎగురుతోంది చూడరా మువ్వన్నెల జెండా
జనం దీవెనల కొరకు
నేతల వంచనలే మించిపోగ
అవ్యవస్థకు నిత్యం జాగృత గీతాలాపనలా
ఎగురుతోంది చూడరా మువ్వన్నెల జెండా
ఎగురుతోంది చూడరా మువ్వన్నెల జెండా
వంద కోట్ల అవని జనులు మన గుండెల నిండా
జాతి ఘనత ప్రతీకగా అదే మనకు అండ
ఎగురుతోంది చూడరా మువ్వన్నెల జెండా