ప‌వ‌న్‌లో మార్పు … అనుమానిస్తున్న టీడీపీ!

ఉప ముఖ్య‌మంత్రి ప‌వ‌న్‌క‌ల్యాణ్‌లో రాజ‌కీయంగా మార్పు వ‌స్తోంద‌ని టీడీపీ అనుమానిస్తోంది. అందుకే ప‌వ‌న్ వైఖ‌రిని ఆ పార్టీ జాగ్ర‌త్త‌గా గ‌మ‌నిస్తోంది. మ‌రీ ముఖ్యంగా చంద్ర‌బాబునాయుడు త‌న నీడ‌ను కూడా న‌మ్మే ర‌కం కాదు. నాలుగు ద‌శాబ్దాల‌కు పైబ‌డి రాజ‌కీయం జీవితంలో ఇలాంటి వాళ్ల‌ను చంద్ర‌బాబు చాలా మందినే చూసి వుంటారు. ప‌వ‌న్‌క‌ల్యాణ్ ఓ లెక్క కాదు. అయిన‌ప్ప‌టికీ, ప్ర‌స్తుత త‌రుణంలో ప‌వ‌న్ అవ‌స‌రం టీడీపీకి ఎంతో వుంది.

ప్ర‌భుత్వం నుంచి ప‌వ‌న్‌క‌ల్యాణ్ ప‌క్క‌కు పోయినా, ప‌డిపోయే ప‌రిస్థితి లేదు. అలాగ‌ని తాత్కాలిక ప్ర‌యోజ‌నాలు చూసుకుని, శాశ్వ‌త రాజ‌కీయ మేలును మ‌రిచిపోవ‌ద్ద‌నేది చంద్ర‌బాబు భావ‌న‌. ప‌వ‌న్‌లో మార్పు వ‌స్తోంద‌ని టీడీపీ అనుమానించ‌డానికి బీజం ఎక్క‌డ ప‌డిందంటే… మంగ‌ళ‌గిరిలోని త‌న ఇంటిని క్యాంప్ ఆఫీస్‌గా మార్చుకుంటున్నా అని, విజ‌య‌వాడ‌లోని త‌నకు ఇరిగేష‌న్ గెస్ట్‌హౌస్‌లో కేటాయించిన ఆఫీస్ వ‌ద్ద‌ని బాబుకు లేఖ రాయ‌డంతో అనుమానం త‌లెత్తింది.

ఒక్క‌సారిగా ప‌వ‌న్ ఎందుకంత షాకింగ్ నిర్ణ‌యం తీసుకున్నార‌నే చ‌ర్చ టీడీపీలో మొద‌లైంది. ఇరిగేష‌న్ గెస్ట్‌హౌస్‌లో ప‌వ‌న్‌కు కేటాయించిన కార్యాల‌యాన్ని జ‌బ‌ర్ద‌స్త్‌గా తీర్చిదిద్ద‌డానికి రూ.80 ల‌క్ష‌ల‌కు పైగా ఖ‌ర్చు అయిన‌ట్టు టీడీపీ నేత‌లే లీకులు ఇచ్చార‌ని ప‌వ‌న్ అనుమానిస్తున్నారు. ప‌వ‌న్‌ను తామెంత బాగా చూసుకుంటున్నామో స‌మాజానికి సందేశం పంప‌డ‌మే టీడీపీ ఆలోచ‌న‌.

అయితే ప్ర‌భుత్వం అప్పుల్లో వుంద‌ని, ఖ‌ర్చుల్ని చూసుకుని చేయాల‌ని ప‌వ‌న్ ప‌దేప‌దే చెబుతుంటారు. కానీ త‌న కార్యాల‌యం విష‌యానికి వ‌చ్చే స‌రికి అవేవీ చూసుకోవ‌డం లేద‌ని, దుబారా చేస్తున్నార‌ని వైసీపీ తీవ్ర విమ‌ర్శ‌లు చేసింది. దీంతో ప‌వ‌న్ హ‌ర్ట్ అయిన‌ట్టు తెలిసింది. కావాల‌నే త‌న‌ను బ‌ద్నాం చేస్తున్నార‌ని, కావున త‌న ఇంటినే క్యాంప్ ఆఫీస్‌గా చేసుకుంటాన‌ని చంద్ర‌బాబుకు ప‌వ‌న్ షాక్ ఇచ్చారు.

ప‌వ‌న్ వైఖ‌రిపై టీడీపీ నేత‌లు గుర్రుగా ఉన్నారు. అన్నీ ప‌వ‌న్ మాట్లాడ్తార‌ని, ల‌గ్జరీ గెస్ట్‌హౌస్‌ను కార్యాల‌యంగా ఇవ్వ‌డంతో పాటు సౌక‌ర్యాల ఏర్పాటుకు భారీ మొత్తంలో నిధులు కేటాయించిన త‌ర్వాత ఇదేం ప‌ద్ధ‌త‌ని టీడీపీ నేత‌లు ప్ర‌శ్నిస్తున్నారు. ప‌వ‌న్ వైఖ‌రిలో చిన్న మార్పు క‌నిపిస్తోంద‌ని, ఆయ‌న ఎప్పుడు ఎలాంటి నిర్ణ‌యం తీసుకుంటారో ఎవ‌రికీ అర్థం కావ‌డం లేద‌నే చ‌ర్చ టీడీపీలో అంత‌ర్గ‌తంగా సాగుతోంది.