అకిరా అరంగేట్రంలో నిజం ఎంత?

పవన్ కల్యాణ్ హీరోగా నటిస్తున్న ఓజీ సినిమాలో ఓ టీనేజ్ పాత్రతో అకిరా నందన్ అరంగేట్రం చేయబోతున్నాడనే వార్త నిన్నంతా తెగ హల్ చల్ చేసింది. దీనిపై కొన్ని యూట్యూబ్ ఛానెళ్లు డిస్కషన్ కూడా పెట్టడం విశేషం.

ఇంతకీ నిజంగానే ఓజీ సినిమాతో అకిరా డెబ్యూ ఇస్తున్నాడా? కొడుకు అరంగేట్రానికి పవన్ కల్యాణ్ గ్రీన్ సిగ్నల్ ఇచ్చాడా?

అంతా అనుకుంటున్నట్టు ఇది నిజం కాదు. ప్రస్తుతానికి ఇది ఊహాగానం మాత్రమే. పవన్ అంటే అభిమానం, ఇంకాస్త ఉబలాటం మాత్రమే కనిపిస్తోంది తప్ప, అకిరా అరంగేట్రానికి పవన్ అంగీకరించే అవకాశాలు చాలా తక్కువ.

ఎందుకంటే, ప్రస్తుతం అకిరా చదువుకుంటున్నాడు. అతడికి కేవలం 20 ఏళ్లు. ఇలా చదువును మధ్యలో ఆపేసి సినిమాల్లోకి రావడం పవన్ కల్యాణ్ కు ఇష్టం లేదు.

కనీసం గ్రాడ్యుయేషన్ అయినా పూర్తయితే తప్ప, పవన్ నుంచి అకిరా డెబ్యూకు గ్రీన్ సిగ్నల్ రాదు. ఇదే విషయాన్ని ఆయన గతంలో పలుమార్లు స్పష్టంచేశారు కూడా. అయితే అకిరా సినిమాల్లోకి రావడం మాత్రం పక్కా. ఓవైపు చదువుకుంటూనే, మరోవైపు అతడు నటనలో శిక్షణ తీసుకుంటున్నాడు. సంగీతం కూడా నేర్చుకుంటున్నాడు.

చదువు పూర్తయిన తర్వాత స్క్రీన్ ప్లే రైటింగ్ లో శిక్షణ తీసుకునే అవకాశం కూడా ఉందని రేణుదేశాయ్ గతంలోనే స్పష్టంచేశారు. సో.. ఓజీ సినిమాలో అకిరా డెబ్యూ అనేది ప్రస్తుతానికి పుకారు మాత్రమే.