పొలిటికల్​ బాంబు పేల్చిన ఎర్రబెల్లి

రాజకీయాల్లో ఎవరు చెప్పేది నిజమో, ఎవరు చెప్పేది అబద్ధమో తెలియదు. కాంగ్రెసు ప్రభుత్వాలు ఎప్పుడూ అనిశ్చితిగానే ఉంటాయి కాబట్టి ఎవరేం చెప్పినా నిజమేమో అనిపిస్తుంది. తాజాగా బీఆర్​ఎస్​ నాయకుడు ఎర్రబెల్లి దయాకర్​ రావు పొలిటికల్​ బాంబు పేల్చారు. ఏమని? రేవంత్​ రెడ్డి సర్కారును కాంగ్రెసు పార్టీ ఎమ్మెల్యేలే కూల్చేస్తారని అన్నారు.

పాతికమంది ఎమ్మెల్యేలు ఆయన పట్ల అసంతృప్తిగా ఉన్నారని అంటున్నాడు. అంటే ఆ ఎమ్మెల్యేలు పార్టీ నుంచి తప్పుకుంటే ప్రభుత్వం పడిపోతుందని చెప్పడమన్నమాట. ఎర్రబెల్లి ఆధారాలు లేకుండా మాట్లాడరని బీఆర్​ఎస్​ ఎమ్మెల్యేలు అంటున్నారు. ఎర్రబెల్లి బీఆర్​ఎస్​ నాయకుడు కాబట్టి ఆయన్ని సమర్థించడం సహజం.

అయితే రాజకీయ నాయకులు చెప్పేది ఏదీ నమ్మలేం. చాలా పొలిటికల్​ గేమ్​లు, మైండ్​ గేమ్​లు ఆడుతుంటారు. ఎర్రబెల్లి కూడా మైండ్​ గేమ్​ ఆడుతుండవచ్చు. అయితే సాధారణంగా కాంగ్రెసు ప్రభుత్వాలు అనిశ్చితిగానే ఉంటాయి. సహజంగానే ఆ పార్టీలో అసంతృప్తి కూడా ఎక్కువగానే ఉంటుంది. కాబట్టి ఎర్రబెల్లి చెప్పింది కూడా కొట్టిపారేయడానికి అవకాశం లేదు.

అందులోనూ కాంగ్రెసు ప్రభుత్వంపై ప్రజల్లో అసంతృప్తి, వ్యతిరేకత ఉన్నాయనేది వాస్తవమే. అయితే బీఆర్​ఎస్​ నాయకులు కాంగ్రెసు వ్యతిరేక ప్రచారాన్ని ముమ్మరంగా చేస్తున్నారు. ఎర్రబెల్లి దయాకర్​రావుది ఆ వ్యతిరేక ప్రచారంలో భాగమే కావొచ్చు. ఈ మధ్య పదిమంది కాంగ్రెసు ఎమ్మెల్యేలు రహస్యంగా సమావేశమైన సంగతి తెలిసిందే.

వీరు సీఎంకు వ్యతిరేకంగా సమావేశమయ్యారని ప్రచారం జరిగింది. కాని తాము ఒక మంత్రికి వ్యతిరేకంగా సమావేశమయ్యామని వారు చెప్పారు. బీఆర్​ఎస్​ నుంచి కాంగ్రెసు పార్టీలో చేరిన పది మంది ఎమ్మెల్యేల్లో కొందరు ప్రభుత్వానికి వ్యతిరేకంగా అప్పుడప్పుడూ మాట్లాడుతూనే ఉన్నారు.

ఇక రేవంత్​ రెడ్డిని పాతికమంది ఎమ్మెల్యేలు వ్యతిరేకిస్తున్నారంటే చాలా పెద్ద సంఖ్యే అని చెప్పుకోవాలి. ఆ ఎమ్మెల్యేలు ఎవరనేది కాంగ్రెసు పార్టీలో చర్చ జరుగుతోంది. అధిష్టానం వద్ద కూడా రేవంత్​ రెడ్డి పరపతి తగ్గిందని బీఆర్​ఎస్​ ప్రచారం చేస్తోంది. చూడాలి రేవంత్​ రెడ్డి సర్కారు భవిష్యత్తు ఎలా ఉంటుందో.