Epaper
ప్రస్తుతం తమిళ్ నుంచి తెలుగులోకి ఓ సినిమా వస్తుందంటే చాలు టాలీవుడ్ ప్రేక్షకులు హడలిపోతున్నారు. ఈసారి ఎలాంటి టైటిల్ వినాల్సి వస్తుందోనని భయం. దీనికి కారణం, ఈమధ్య తమిళ సినిమాల్ని అదే టైటిల్ తో విడుదల చేస్తున్నారు, తెలుగులో కూడా.
మొన్నటికిమొన్న అజిత్ నటించిన వలిమై సినిమాను, అదే టైటిల్ తో తెలుగులో రిలీజ్ చేశారు. ఆ సినిమాకు తెలుగులో బలం అనే పేరు కూడా పెట్టారు. అంతలోనే దాన్ని తీసేసి వలిమై అనే పేరుతోనే రిలీజ్ చేశారు. ఇప్పటికీ చాలామంది తెలుగువాళ్లకు వలిమై అంటే ఏంటో తెలీదు.
ఇప్పుడు మళ్లీ అదే హీరో నుంచి ఇంకో సినిమా వస్తోంది. దీంతో ఈసారి ఏ తమిళ పదం తెలుగుతెరపైకి దండెత్తుతుందోనని అంతా భయపడ్డారు. అయితే ఈసారి ఆ ప్రమాదం లేదు. అజిత్ సినిమాకు తెలుగు టైటిల్ ఫిక్స్ చేశారు.
ప్రస్తుతం తునివు అనే సినిమా చేస్తున్నాడు అజిత్. ఈ సినిమాను కూడా అదే టైటిల్ తో రిలీజ్ చేయాలనుకున్నారు. కానీ ఏమనుకున్నారో ఏమో, ఆఖరి నిమిషంలో దానికి తెగింపు అని నామకరణం చేశారు.
టైటిల్ హ్యాష్ ట్యాగ్ తో సోషల్ మీడియాలో ప్రచారం చేయడం కామన్. తెలుగులో ఒక టైటిల్, తమిళ్ లో మరో టైటిల్ పెట్టి ప్రచారం చేయడం వల్ల సదరు హ్యాష్ ట్యాగ్ ట్రెండింగ్ లోకి రావడం లేదు. అందుకే ఒకే పేరు పెట్టి విడుదల చేయడం మొదలుపెట్టారు. కానీ చాలామంది వ్యతిరేకించడంతో, మళ్లీ ఇప్పుడు తెలుగు టైటిల్స్ పెట్టడం స్టార్ట్ చేశారు.