పెర్త్ టెస్ట్.. పూర్తిగా మారిపోయింది!

తొలి రోజు ఏకంగా 17 వికెట్లు ప‌డ్డాయి. సీమ‌ర్ల‌కు స్వ‌ర్గ‌ధామంలా క‌నిపించింది, అస‌లు ఇలాంటి పిచ్ ల‌పై టెస్టులు నిర్వ‌హించ‌డ‌మా అంటూ రెండో రోజు ఉద‌యం కామెంట‌రేట‌ర్లు చ‌ర్చ మొద‌లుపెట్టారు! ఉప‌ఖండంలో స్పిన్ ట్రాక్ ల‌పై బ్యాటర్లు అప‌సోపాలు ప‌డుతుంటే అలాంటి పిచ్ ల మీద మ్యాచ్ లు నిర్వ‌హించ‌డంపై విమ‌ర్శ‌లు వ‌స్తూ ఉంటాయ‌ని, అయితే ఇలా సీమ్ ట్రాక్ ల‌పై మాత్రం విమ‌ర్శ‌లు రావేమీ అంటూ ఒక విదేశీ కామెంట‌రేట‌ర్ అంటే, ర‌విశాస్త్రి కాస్త క‌వ‌ర్ చేసే ప్ర‌య‌త్నం చేశారు. బ‌హుశా టీమిండియా పేస‌ర్లు విజృంభించ‌డంతోనో ఏమో కానీ.. ర‌వి మాట్లాడుతూ.. పిచ్ ను పెద్ద‌గా త‌ప్పు ప‌ట్టాల్సిన అవ‌స‌రం లేద‌ని, బౌల‌ర్లు రాణించార‌ని వ్యాఖ్యానించారు. అయితే ఆ త‌ర్వాత ప‌రిస్థితి పూర్తిగా మారిపోయింది.

ఆస్ట్రేలియ‌న్ టైలెండ‌ర్ల‌ను పెవిలియ‌న్ కు పంప‌డానికి టీమిండియా బౌల‌ర్లు శ్ర‌మ ప‌డటంతో మొద‌లుపెడితే, రెండో ఇన్నింగ్స్ బ్యాటింగ్ లో భార‌త ఓపెనర్ల ను ఆసీస్ బౌల‌ర్లు ఏ మాత్రం ఇబ్బంది పెట్ట‌లేక‌పోయారు! తొలి ఇన్నింగ్స్ ల‌లో రెండు జ‌ట్లూ దాదాపు 50 ఓవ‌ర్ల‌కు ఆలౌట్ అయ్యాయి, అయితే టీమిండియా రెండో ఇన్నింగ్స్ బ్యాటింగ్ లో 50 ఓవ‌ర్ల‌ను ఓపెన‌ర్లే ఆడేశారు! ఈ మ్యాచ్ లో తొలి వంద ఓవ‌ర్ల‌లో 20 వికెట్లు ప‌డితే, ఆ త‌ర్వాతి 50 ఓవ‌ర్ల‌లో ఒక్క‌టంటే ఒక్క వికెట్ ప‌డ‌లేదు! ఒక‌టీ అర అవ‌కాశాల‌ను ఆసీస్ మిస్ చేసుకుంది. భార‌త ఓపెన‌ర్లు య‌శ‌స్వి జైశ్వాల్, కేఎల్ రాహుల్ లు జాగ్ర‌త్త‌గా అయితే ఆడారు. తొలి ఇన్నింగ్స్ ఫెయిల్యూర్ ను దృష్టిలో ఉంచుకుని ఆచితూచి ఆడారు. అయితే ఎక్క‌డ మ‌రీ ఇబ్బంది ప‌డిపోలేదు. కాస్త కుద‌రుకున్నాకా మంచి మంచి షాట్ల‌ను ఆడారు.

అస‌లు తొలి రోజు ఆడింది ఈ పిచ్ మీదేనా అనే సందేహాన్ని క‌లిగించే స్థాయిలో రెండో రోజు ఆట సాగింది. తొలి రోజు ప‌చ్చ‌గా క‌నిపించిన పిచ్ రెండో రోజు ఎండిన గ‌డ్డితో రంగు మారిపోయింది. ప్ర‌తి యాభై ఓవ‌ర్ల‌కూ ప‌ది వికెట్లు ప‌డిపోయే ప‌రిస్థితి నుంచి యాభై ఓవ‌ర్ల పాటు ఒక్క వికెట్ కూడా ప‌డ‌ని రీతిలో మారిపోయింది. కేవ‌లం పిచ్ మీద నెపం నెట్ట‌డం కాదు కానీ, భార‌త బౌల‌ర్ల‌తో పోలిస్తే ఆసీస్ బౌల‌ర్లు వెల‌వెల‌బోయారు కూడా! ఇలాంటి సీమ్ వికెట్ల‌పై
త‌మ‌కు తిరుగులేదు, వారు వ‌ర‌ల్డ్ క్లాస్ బౌల‌ర్లు అనుకున్న క‌మ్మిన్స్, స్టార్క్, హ‌జ‌ల్ వుడ్ త్ర‌యం మొద‌టి ఇన్నింగ్స్ స్థాయిలో కూడా బౌల్ చేయ‌లేదు. ప‌ది ఓవ‌ర్ల పాటు వికెట్ ప‌డ‌క‌పోయే స‌రికే వారిలో ఫ్ర‌స్ట్రేష‌న్ మొద‌లైపోయింది. అది క్ర‌మంగా పీక్స్ కు చేరిపోయింది. దీంతో బౌలింగ్ కూడా క్ర‌మంగా గాడి త‌ప్పింది. నోబాల్స్ ప‌డ్డాయి, బౌన్స‌ర్లు వైడ్ లుగా ఫోర్ లైన్ ను చేరాయి.

స్థూలంగా తాము వంద‌కు ఆలౌట్ అయిన త‌ర్వాత భార‌త ఓపెన‌ర్లే వంద రన్నుల‌ను పూర్తి చేసే స‌రికి ఆసీస్ జ‌ట్టులో స్ప‌ష్ట‌మైన అస‌హ‌నం క‌నిపించింది. ర‌నౌట్ ఛాన్స్ మిస్ చేసుకున్నారు. ఒక క్యాచ్ ను క్యారీ చేయ‌లేపోయారు. కీల‌క‌మైన తొలి ఇన్నింగ్స్ ఆధిక్యంతో క‌లుపుకుంటే.. టీమిండియా రెండో రోజు ముగిసే స‌రికి 218 ప‌రుగుల లీడ్ ను సంపాదించింది. ఇంకా చేతిలో ప‌ది వికెట్లున్నాయి. బంతి పాతబ‌డ‌టంతో ఇంకో ముప్పై ఓవ‌ర్ల పాటు ఆసీస్ బౌల‌ర్లు అద్భుతాలు చేసే అవ‌కాశాలు కూడా దాదాపు లేన‌ట్టే.

టీమిండియా ఆధిక్యం మూడు వంద‌లు దాటిందంటే.. అక్క‌డ నుంచి మ్యాచ్ ఆసీస్ కు దూరం అవుతున్న‌ట్టే! నాలుగో ఇన్నింగ్స్ లో ఏ జ‌ట్టు అయినా మూడు వంద‌ల‌కు మించిన ఆధిక్యాన్ని చేధించిన దాఖ‌లాలు చ‌రిత్ర‌లో అరుదుగా ఉన్నాయి. చేతిలో ఎలాగూ ప‌ది వికెట్లున్నాయి, ఇంకా కావాల్సినంత స‌మ‌యం కూడా ఉంది కాబ‌ట్టి.. టీమిండియా త‌మ ఆధిక్యాన్ని నాలుగు వంద‌ల స్థాయికి తీసుకెళ్లినా తీసుకెళ్లొచ్చు. మొత్తానికి బోర్డ‌ర్- గ‌వాస్క‌ర్ ట్రోఫీ తొలి టెస్టు ఎలాగో మొద‌లై.. ఎలాగెలాగో సాగుతూ ఉంది!