Epaper
ప్రేమిస్తే పోయేదేముంది అనుకున్నాడు. ఎంచక్కా ప్రేమించాడు. అమ్మాయిలో ఆశలు రేపాడు. పెళ్లి అనేసరికి మాత్రం ప్లేటు ఫిరాయించాడు. ప్రేమ ఫ్రీ, పెళ్లి మాత్రం కాస్ట్ లీ అంటూ కండిషన్లు పెట్టాడు. దీంతో మానసిక వేదనకు గురైన ఆ అమ్మాయి ఆత్మహత్య చేసుకుంది. బాపట్లలో జరిగింది ఈ ఘటన.
బాపట్లలో ఉంటున్న శివపార్వతికి ఇద్దరు కుమార్తెలు. భర్త చనిపోవడంతో తనే కష్టపడుతూ పిల్లలిద్దర్నీ పెంచి పోషిస్తోంది. పెద్దమ్మాయి స్థానికంగా లా డిగ్రీ చదువుతోంది. తన కాలేజీలోనే తేజ అనే కుర్రాడ్ని ప్రేమించింది. ఇద్దరూ ప్రేమించుకున్నారు. తేజను పెళ్లి చేసుకుంటాననే విషయాన్ని ఇంట్లో చెప్పింది అమ్మాయి. కులాంతర వివాహం అయినప్పటికీ, కూతురు సంతోషం కోసం తల్లి శివపార్వతి అంగీకరించింది.
అంతా ఓకే అనుకున్న టైమ్ కు తేజ రివర్స్ అయ్యాడు. 2 నెలలుగా అతడి ప్రవర్తనలో మార్పు వచ్చింది. ప్రేమ వరకు ఓకే కానీ, పెళ్లి చేసుకోవాలంటే మాత్రం 15 లక్షలు కావాలని డిమాండ్ చేశాడు. ఒక రకంగా చెప్పాలంటే కట్నం అడిగాడు. ప్రస్తుతం అంత డబ్బు తమ వద్ద లేదని చెప్పడంతో ప్రేయసిని దూరం పెట్టాడు.
తేజ తనను దూరం పెట్టడంతో ఆ అమ్మాయి మానసికంగా కుంగిపోయింది. తల్లి, చెల్లి ధైర్యం చెప్పినప్పటికీ కోలుకోలేకపోయింది. ఈ క్రమంలో మరింత కుంగుబాటుకు గురై పురుగుమందు తాగి ఆత్మహత్యకు యత్నించింది. వెంటనే ఆమెను హాస్పిటల్ లో జాయిన్ చేసినప్పటికీ ఫలితం లేకపోయింది. చికిత్స పొందుతూ మరణించింది.
కుమార్తె మరణంతో ఆ తల్లి, చెల్లెలు బాధ వర్ణనాతీతం. ఇప్పటికే ఇంటి పెద్దదిక్కును కోల్పోయిన ఆ కుటుంబం, ఇప్పుడు పెద్ద కూతుర్ని కూడా కోల్పోయింది. జరిగిన ఘటనపై పోలీసులు కేసు నమోదు చేశారు. ప్రస్తుతం తేజ పరారీలో ఉన్నాడు.