బిగ్‌బాసేనా… ఆ చాన‌ల్‌లో అశ్లీల‌త మాటేంటి?

బిగ్‌బాస్ రియాల్టీ షో ప్రారంభ‌మైతే చాలు… కొంద‌రు దానిపై కోర్టులో కేసు వేయ‌డానికి ముందుకొస్తుంటారు. తాజాగా నిర్మాత కేతిరెడ్డి కోర్టులో బిగ్‌బాస్ రియాల్టీ షోపై పిటిష‌న్ వేశారు. ఆ షోలో అశ్లీల‌త‌, అస‌భ్య‌త వుంద‌ని, కావున దాన్ని అడ్డుకోవాల‌నేది ఆయ‌న పిటిష‌న్ సారాంశం. అంతేకాదు, ఏ స‌మ‌యంలో ప్ర‌సారం చేయాలో కూడా పిటిష‌న‌రే చెప్ప‌డం గ‌మ‌నార్హం.

నిజంగా అశ్లీల‌త‌, అస‌భ్య‌త ఉన్న ప్ర‌సారాల‌ను అడ్డుకోవ‌డ‌మే కేతిరెడ్డి ఉద్దేశ‌మైతే… ముందుగా రాజ‌గురువు చాన‌ల్‌లో “జ‌బ‌ర్ద‌స్త్‌”గా ఏళ్ల త‌ర‌బ‌డి కొన‌సాగుతున్న బూతు షో మాటేంట‌నే ప్ర‌శ్న ఉత్ప‌న్న‌మైంది. ఈ షో ఆక‌ర్ష‌ణే బూతు మాట‌లు త‌ప్ప‌, మ‌రేమైనా కార‌ణం వుందా? అలాగే సినిమా ఫంక్ష‌న్ల‌లో న‌టులు ద్వందార్థాల‌తో మాట్లాడుతున్న మాట‌లు వీళ్ల‌కు ప‌ట్ట‌వా?

గ‌తంలో సీపీఐ నాయ‌కుడు కె.నారాయ‌ణ కూడా బిగ్‌బాస్ రియాల్టీ షోపై న్యాయ‌పోరాటం చేశారు. బ్రోతల షోగా ఆయ‌న అభివ‌ర్ణించారు. ఆయ‌న విమ‌ర్శ‌ల‌పై భిన్నాభిప్రాయాలు వ్య‌క్త‌మ‌య్యాయి. పిటిష‌న‌ర్ల తీరు చూస్తే… పాపుల‌ర్ షో త‌మ వ‌ల్ల వివాదం సృష్టించ‌డం ద్వారా ఉచిత ప్ర‌చారం పొందాల‌నే ఆత్రం త‌ప్ప‌, మ‌రే ఉద్దేశం క‌నిపించ‌డం లేదన్న వాద‌న క‌నిపిస్తోంది.

స‌మాజ శ్రేయ‌స్సు గురించి ఆలోచించే వారైతే అత్యంత వివాదాస్ప‌ద రాజ‌గురువు చాన‌ల్‌లో ప్ర‌సార‌మ‌య్యే దానిపై కేసు వేయాలి. వీళ్లు వేయ‌లేరు. ఎందుకంటే రాజ‌గురువుకు బ‌ల‌మైన మీడియా వ్య‌వ‌స్థ వుంది. ప్ర‌చారం పొందాలంటే వాటి అవ‌స‌రం వుంటుంద‌నే భ‌యం. వీళ్ల న్యాయ పోరాటం కేవ‌లం బ‌ల‌హీనుల‌పైన్నే అనే చ‌ర్చ‌కు తెర‌లేచింది.