మొదటి రోజే వన్ ప్లస్ వన్ ఆఫర్

సాధారణంగా సినిమాలకు రిలీజైన వారం తర్వాత ఆఫర్లు నడుస్తుంటాయి. టాక్ బాగా లేకపోతే ఫస్ట్ వీకెండ్ పూర్తయిన వెంటనే ఆఫర్లు మొదలుపెడతారు. కానీ రకుల్ ప్రీత్ సింగ్ సినిమాకు మాత్రం రిలీజ్ రోజు నుంచే 1+1 ఆఫర్ పెట్టారు. అంటే ఒకటి టికెట్ కొంటే మరో టికెట్ ఉచితం అన్నమాట.

ఈరోజు రిలీజైన “మేరీ హజ్బెండ్ కి బీవీ” సినిమాకు ఏకంగా అడ్వాన్స్ బుకింగ్స్ నుంచే ఈ ఆఫర్ పెట్టడం విశేషం. దీనికి ప్రధానంగా 2 కారణాలున్నాయి. ప్రస్తుతం నార్త్ బెల్ట్ లో సాధారణ సినిమాల్ని చూడడం తగ్గించేశారు జనం. దీనికి తోడు ఛావా సినిమా బ్రహ్మాండమైన హిట్టయింది.

ఇలాంటి క్లిష్ట పరిస్థితుల్లో ప్రేక్షకుల్ని తమవైపు తిప్పుకునేందుకు మొదటి రోజు నుంచే ” ఒక టికెట్ కు ఇంకో టికెట్ ఫ్రీ” పెట్టాల్సిందే. అదే పనిచేశారు మేకర్స్. అయితే ఫలితం మాత్రం అంతంతమాత్రమే.

అర్జున్ కపూర్, రకుల్ ప్రీత్, భూమి పడ్నేకర్ హీరోహీరోయిన్లుగా నటించిన ఈ సినిమాకు ఓ సెక్షన్ నుంచి తీవ్ర వ్యతిరేకత వ్యక్తమౌతోంది. హీరోహీరోయిన్లు నవ్వించడానికి చాలా కష్టపడ్డారని, రైటింగ్ బాగాలేదని సమీక్షలు వస్తున్నాయి. భయంకరమైన పీఆర్ కు పెట్టింది పేరైన బాలీవుడ్ లో ఈ సినిమా పూర్తి ఫలితం తేలాలంటే మరుసటి రోజు వరకు వెయిట్ చేయాల్సిందే.