అద్దె ఇంట్లో స్టార్ హీరోయిన్.. రెంట్ ఎంతో తెలుసా?

ఈమధ్య తరచుగా వార్తల్లో నిలుస్తోంది శ్రద్ధా కపూర్. ఇంకా చెప్పాలంటే స్త్రీ-2 సక్సెస్ నుంచి ఆమె పేరు మార్మోగిపోతోంది. ఆ తర్వాత పుష్ప-2లో ఐటెంసాంగ్ కోసమంటూ శ్రద్ధా కపూర్ పేరు గట్టిగా వినిపించింది. ఇప్పుడీ ముద్దుగుమ్మ మరోసారి వార్తల్లోకెక్కింది.

రీసెంట్ గా ఓ అద్దె ఫ్లాట్ లోకి మారింది శ్రద్ధా కపూర్. ముంబయిలోని ఖరీదైన జుహు ప్రాంతంలో ఉన్న ఆ లగ్జరీ అపార్ట్ మెంట్ లో మూడో ఫ్లోర్ ను శ్రద్ధా కపూర్ అద్దెకు తీసుకుంది. ఆ ఫ్లాట్ కోసం నెలకు ఆమె చెల్లిస్తున్న రెంట్ అక్షరాలా 6 లక్షల రూపాయలు.

ఏడాది పాటు అందులో ఉండేందుకు అగ్రిమెంట్ చేసుకుంది శ్రద్ధా కపూర్. అంతేకాదు, ఏడాది అద్దెను (రూ. 72 లక్షలు) ఒకేసారి చెల్లించింది. అక్టోబర్ 16న ఈ అగ్రిమెంట్ పూర్తయింది.

శ్రద్ధా లాంటి హీరోయిన్లు కావాలనుకుంటే సొంత ఫ్లాట్ కొనుక్కోగలరు. నిజానికి ఆమెకు బాంద్రాలో ఓ ఫ్లాట్ ఉంది కూడా. కానీ ఆమె జుహులో 3929 చదరపు అడుగుల కొత్త ఫ్లాట్ ను అద్దెకు తీసుకుంది. 4 కారు పార్కింగ్ లు కూడా దక్కించుకుంది.

టాలీవుడ్ లో ఈ మధ్య శ్రద్ధా కపూర్ పేరు ఎక్కువగా వినిపిస్తోంది. పుష్ప-2 ఐటెంసాంగ్ ను ఆమె వదులుకున్న తర్వాత.. నాని సినిమాలో హీరోయిన్ పాత్రను ఆమెకు ఆఫర్ చేశారు. అయితే ఆమె డిమాండ్ చేసిన రెమ్యూనరేషన్ చూసి వెనక్కుతగ్గారు. నాని సినిమాలో నటించేందుకు ఆమె 12 కోట్లు డిమాండ్ చేసిందంట.