నియంత్రణ గురించి కూడా చెప్పండి సజ్జల గారూ!

వైఎస్సార్ కాంగ్రెస్ పార్టీకి చెందిన సోషల్ మీడియా కార్యకర్తల మీద విచ్చలవిడిగా కేసులు నమోదు అవుతున్నాయనే ఆందోళన ఆ పార్టీలో వ్యక్తం అవుతోంది. తమ పార్టీ కార్యకర్తల స్థైర్యాన్ని దెబ్బతీయడానికి అధికార పార్టీ కేసులతో వేధిస్తున్నదని అంటున్నారు.

ఇలాంటి సమయంలో కార్యకర్తలను కాపాడుకోవడానికి, వైసీపీ నాయకులు పూనుకుంటున్నారు. కేడర్ డీలాపడిపోకుండా జాగ్రత్తలు తీసుకుంటున్నారు. వైసీపీ ప్రధాన కార్యదర్శి సజ్జల రామక్రిష్ణారెడ్డి రాష్ట్రవ్యాప్తంగా ఉన్న సోషల్ మీడియా కార్యకర్తలతో ఒక టెలికాన్ఫరెన్స్ నిర్వహించి అనేక సూచనలు చేశారు. వారిలో ధైర్యం నింపే ప్రయత్నం చేశారు.

సోషల్ మీడియా కార్యకర్తలకు పార్టీ అండగా నిలుస్తుందని, కేసులు పెడుతున్న వారిపై న్యాయపోరాటానికి సిద్ధంగా ఉండాలని సజ్జల అంటున్నారు. ఎక్కడైనా కేసులు నమోదు అయితే గనుక.. నియోజకవర్గాల వారీగా ఉన్న నాయకత్వం వెంటనే స్పందించాలని, ఎక్కడికక్కడ పార్టీ కోసం సమన్వయ కమిటీలు ఏర్పాటు చేసుకోవాలని, లాయర్ల సేవలను వాడుకోవాలని అంటున్నారు.

మొత్తానికి సోషల్ మీడియా కార్యకర్తలపై వచ్చే కేసుల సంగతి చూసుకోవడానికి వైసీపీ కేంద్ర కార్యాలయంలో ఒక కంట్రోల్ రూం కూడా ఏర్పాటు చేయబోతున్నట్టు, అక్కడ సీనియర్ న్యాయవాదులను సలహాలకోసం నిత్యం అందుబాటులో ఉంచబోతున్నట్టు సజ్జల ప్రకటించారు.

అంతా బాగానే ఉంది. తమ కార్యకర్తల మీద కేసులు నమోదు అయితే న్యాయపోరాటం చేయడం గురించి మాత్రమే సజ్జల వారికి ధైర్యం చెబుతున్నారు. అయితే.. దీనితోపాటు, అసలు కేసులు నమోదు కాకుండా పోస్టులు పెట్టేప్పుడు ఎలాంటి జాగ్రత్తలు తీసుకోవాలో కూడా సూచనలు చేస్తే బాగుంటుందని కార్యకర్తలు కోరుకుంటున్నారు.

స్వతహాగా జర్నలిస్టు కూడా అయిన సజ్జల రామక్రిష్ణారెడ్డి.. సోషల్ మీడియా పోస్టుల్లో ఎలాంటి భాష వాడాలి, ఎలాంటి భాష వాడకూడదు, పోస్టులకోసం నాయకుల ఫోటోలతో డిజైన్లు చేసేటప్పుడు ఎలాంటి హద్దులు గుర్తుంచుకోవాలి.. వంటి విషయాలను కూడా కార్యకర్తలకు తెలియజెబితే అసలు కేసులే నమోదు కాకుండా చూసుకోవచ్చు కదా అనే అభిప్రాయం వ్యక్తమవుతోంది.

సోషల్ మీడియా కార్యకర్తలు పోస్టుల విషయంలో ఎలాంటి నియంత్రణ పాటించాలో అవగాహన కల్పిస్తే.. కేసుల దాకా రాకుండా.. ప్రభుత్వ దుర్మార్గాలను ఎండగట్టడం సాధ్యమవుతుంది కదా? అంటున్నారు.