కుల వ్య్వవస్థ చాలా మంచిది.. దేశానికి మేలు !

మన దేశంలో కుల వ్యవస్థ అనేది చాలా చెడ్డదని, కులాల కారణంగానే సమాజంలో అంతరాలు ఉన్నాయని హేతువాదులు, సామాజిక వేత్తలు, యాక్టివిస్టులు, ప్రధానంగా కమ్యూనిస్టులు చెబుతుంటారు. కుల వ్యవస్థ మీద తెలుగులోనూ చాలా పుస్తకాలు వచ్చాయి. ఇతర భాషల్లో వచ్చిన పుస్తకాలు అనువాదమయ్యాయి.

హిందువుల్లో కుల వ్యవస్థను చీదరించుకొని వేరే మతాల్లోకి మారిపోయినవారూ ఉన్నారు. రాజ్యాంగం రాశాడని చెబుతున్న డాక్టర్ అంబేద్కర్ బౌద్ధ మతం స్వీకరించారు. బుద్ధుడు కుల వ్యవస్థను వ్యతిరేకించాడని చెబుతారు. మన దేశంలో ఆధిపత్య కులాలు, అణగారిన కులాలు ఉన్నాయి. ఆధిపత్య కులాలు ఎప్పుడూ కింది కులాలను అణిచివేయాలని చూస్తుంటాయి.

తెలుగు రాష్ట్రాల్లోనూ, దేశంలోని ఇతర రాష్ట్రాల్లోనూ కుల ఘర్షణలు జరిగాయి. ఊచకోత ఘటనలు జరిగాయి. మారణ కాండ జరిగింది. వెలివేతలు జరిగాయి. ఇందుకు రకరకాల కారణాలు ఉండొచ్చు. నిమ్న కులాలకు సమాన అవకాశాలు రావడానికి, వారు అభివృద్ధి చెందడానికే రిజర్వేషన్లు పెట్టారు.

అంబేద్కర్ పదేళ్లు అంటే, రాజకీయ ప్రయోజనాల కోసం అరవై ఏళ్లకు పైగా కొనసాగిస్తున్నారు. చివరకు అది వెర్రి తలలు వేస్తోంది. అగ్ర వర్ణాలుగా చెబుతున్నవారికి అవకాశాలు కరువైపోతున్నాయి. కుల వ్యవస్థ, రిజర్వేషన్లు అనేది ఒడవని చర్చ. కులాన్ని తీవ్రంగా వ్యతిరేకించే కమ్యూనిస్టు పార్టీలు సమసమాజం మంత్రం జపిస్తుంటాయి.

పాత తరం కమ్యూనిస్టులు తమ పేరు పక్కన కులం పేరు సూచించే రెడ్డి, చౌదరి, శర్మ, శాస్త్రి ఇలాంటివి తీసేసేవారు. కానీ ఇప్పుడు ఆ పని చేయడంలేదు. ఒక కమ్యూనిస్టు పార్టీ అనుబంధ సంఘాల్లో కుల నిర్మూలన సంఘం ఉంది. ఎక్కువమంది కులాంతర వివాహాలు చేసుకుంటే కులం అంతరిస్తుందని వీరి అభిప్రాయం.

కానీ చట్ట ప్రకారం అలాంటిది ఏమీ జరగదు. భార్యా భర్తల కులాలు మారవు. వాళ్ళ పిల్లలకు మాత్రం తండ్రి కులం వర్తిస్తుంది. తెలుగు రాష్ట్రాల్లో తెలంగాణా కంటే ఆంధ్రాలో కుల ప్రభావం ఎక్కువ. ఇలా చెప్పుకుంటూ పొతే చాలా కథ ఉంది. ఒక్క మాటలో చెప్పాలంటే కులం లేకుండా భారత దేశం లేదు.

ఇదంతా ఎందుకు చెప్పుకోవాల్సి వచ్చిందంటే .. రాష్ట్రీయ స్వయం సేవక్ సంఘ్ (ఆర్ ఎస్ ఎస్ ) అధికార పత్రిక “పాంచజన్య ” తాజాగా కుల వ్యవస్థను గట్టిగా సమర్ధించింది. కుల వ్యవస్థ వల్లనే భారత దేశం ఐక్యంగా ఉందని తేల్చిపారేసింది. మొఘల్ పాలకులు కుల వ్యవస్థను అర్ధం చేసుకోలేదని చెప్పింది.

కానీ బ్రిటిష్ పాలకులు విభజించి పాలించు అనే విధానంలో దేశాన్ని దెబ్బ తీయడానికి ప్రయత్నాలు చేశారని చెప్పింది. అసలు పాంచజన్య ఇలా ఎందుకు చెప్పిందంటే …కాంగ్రెస్ పార్టీ కుల గణన చేయాలని డిమాండ్ చేస్తోంది కదా.

దాన్ని విమర్శిస్తూ కుల వ్యవస్థను సమర్ధించిందన్నమాట. హిందువుల ఓట్లను చీల్చడానికి కాంగ్రెస్ కుల గణనను సాధనంగా ఎంచుకుందని మండిపడింది. బ్రిటీషర్ల మెంటాలిటీ, కాంగ్రెస్ మెంటాలిటీ ఒకటేనని చెప్పింది. మొత్తం మీద దేశ ప్రజలను చీల్చడమే కాంగ్రెస్ లక్ష్యమంది.