భారీ క్రేజ్.. అంతలోనే భారీ ఫ్లాప్

ఆల్రెడీ తమిళనాట క్రేజీ ఆఫర్ కొట్టేసింది. ఒకానొక టైమ్ లో ప్రభాస్ సినిమా కోసం ప్రయత్నించినట్టు వార్తలొచ్చాయి. అటు అల్లు అర్జున్ పేరు కూడా ప్రముఖంగా వినిపించింది. అలా పెద్ద హీరోలు, ప్రాజెక్టులు చుట్టూ నలుగుతున్న పేరు రుక్మిణి వసంత్.

“సప్త సాగరాలు దాటి..” సినిమాతో ఓవర్ నైట్ లో పాపులరైంది రుక్మిణి వసంత్. ఇప్పటికీ ఆమెకు ఆ క్రేజ్ ఉంది. కానీ అంతలోనే వచ్చిన ఓ సినిమా ఈ ముద్దుగుమ్మ క్రేజ్ ను తగ్గించేసింది. అదే “అప్పుడో ఇప్పుడో ఎప్పుడో”.

నిఖిల్ హీరోగా నటించిన ఈ సినిమాలో హీరోయిన్ గా చేసింది రుక్మిణి వసంత్. తెలుగులో ఆమెకు తొలి సినిమా ఇదే. నిజానికి రెండేళ్ల కిందటే రిలీజ్ అవ్వాల్సిన ఈ సినిమా లేటుగా రిలీజైంది. ఇది హిట్టయితే ఆమె క్రేజ్ మరింత పెరిగి ఉండేది, కానీ ఫ్లాప్ అయింది. దీంతో రుక్మిణి పాపులారిటీకి స్పీడ్ బ్రేకర్ గా మారింది ఈ సినిమా.

కేవలం ఓటీటీ కోసం ఈ సినిమాను ఆఘమేఘాల మీద విడుదల చేశారు. సరైన ప్రచారం కూడా చేయలేదు. చివరికి రుక్మిణి వసంత్ ఇంటర్వ్యూను కూడా విడుదలకు ఒక్కరోజు ముందు వదిలారు. ఇలా ప్లానింగ్ లేని ప్రచారంతో వచ్చిన ఈ సినిమాకు అస్సలు ఓపెనింగ్స్ రాలేదు, టాక్ కూడా ఘోరం.

ప్రస్తుతం “అప్పుడో ఇప్పుడో ఎప్పుడో” యూనిట్ అంతా సైలెంట్ అయింది. హమ్మయ్య ఓ సినిమాను వదిలించుకున్నాం అనే ఫీలింగ్ అందర్లో కనిపిస్తోంది. చివరికి హీరో నిఖిల్ కూడా మీడియాతో తన సినిమాల గురించి మాట్లాడుతూ.. ఈ మూవీని మాత్రం ప్రస్తావించలేదు. అయితే నిఖిల్ ప్రస్తావించనంత మాత్రాన ఈ ఫ్లాప్ భారం ఆయనపై పడకుండా పోదు. అదే టైమ్ లో హీరోయిన్ గా నటించిన రుక్మిణి వసంత్ కెరీర్ పై కూడా ప్రభావం చూపిస్తుంది.