సీనియర్ నటి అరెస్ట్ తప్పదా..?

తమిళనాట స్థిరపడిన తెలుగు ప్రజలపై అనుచిత వ్యాఖ్యలు చేసిన నటి కస్తూరిని కోర్టు కూడా కనికరించలేదు. ఆమె పెట్టుకున్న ముందస్తు బెయిల్ పిటిషన్ ను మద్రాసు హైకోర్టుకు చెందిన మధురై బెంచ్ కొట్టేసింది. దీంతో ఏ క్షణానైనా పోలీసులు ఆమెను అరెస్ట్ చేసే అవకాశం ఉందంటున్నారు.

తమిళ రాజుల అంతఃపురాల్లో సేవలు చేసేందుకు వచ్చిన తెలుగువాళ్లు, తమనుతాము తమిళ జాతిగా చెప్పుకుంటున్నారంటూ వివాదాస్పద వ్యాఖ్యలు చేశారు కస్తూరి. దీనిపై నాయుడు మహాజన సంఘం ఫిర్యాదు చేయడంతో, తిరునగర్ పోలీసులు కేసు నమోదు చేశారు.

ఈ కేసుకు సంబంధించి ముందస్తు బెయిల్ కోరుతూ కోర్టును ఆశ్రయించారు కస్తూరి. ఆమె వ్యాఖ్యపై కోర్టు కూడా అభ్యంతరం తెలిపింది. క్షణికావేశంలో కూడా కస్తూరి అలాంటి కామెంట్స్ చేయకూడదని కోర్టు అభిప్రాయపడింది. అంతేకాదు, ఆమె చెప్పిన క్షమాపణల్లో కూడా మహిళలపై చేసిన వ్యాఖ్యల్ని ప్రస్తావించలేదని కోర్టు అభిప్రాయపడింది.

కస్తూరికి ముందస్తు బెయిల్ ఇవ్వొద్దంటూ అడిషనల్ పబ్లిక్ ప్రాసిక్యూటర్ తన వాదనలను బలంగా వినిపించారు. ప్రస్తుతం తమిళనాడుకు, కేరళ-కర్నాటకతో మంచి సంబంధాల్లేవని.. కస్తూరి లాంటి వాళ్లకు ముందస్తు బెయిల్ ఇస్తే ఆంధ్ర-తెలంగాణతో కూడా సంబంధాలు దెబ్బతింటాయని వాదించారు.

ఈ విషయంపై పూర్తిస్థాయిలో ఇంటరాగేషన్ అవసరం కాబట్టి, ముందస్తు బెయిల్ ఇవ్వొద్దని వాదించారు. ఈ వాదనతో ఏకీభవించిన జడ్జి, కస్తూరికి ముందస్తు బెయిల్ ఇవ్వడానికి నిరాకరించారు. దీంతో ఆమెను పోలీసులు ఏ క్షణానైనా అరెస్ట్ చేసే అవకాశం ఉంది.