ఆర్ కృష్ణయ్య టీడీపికి దగ్గరవుతున్నారా?

జగన్మోహన్ రెడ్డి తన అనాలోచిత పరిపాలన విధానాలు, నిర్ణయాలతో అనుచితంగా పదవులు కట్టబెట్టిన వారిలో బీసీ సంఘాల నాయకుడు ఆర్ కృష్ణయ్ కూడా ఒకరు. ఆంధ్రప్రదేశ్ రాష్ట్రంలో బీసీ సంఘాల నాయకులే లేనట్టుగా.. వైఎస్సార్ కాంగ్రెస్ పార్టీలో బీసీ వర్గాల్లో ప్రముఖ నాయకులకు గతి లేనట్టుగా తెలంగాణ నుంచి ప్రత్యేకంగా ఆర్ కృష్ణయ్య ను తీసుకువచ్చి ఏపీ నుంచి తమ పార్టీ తరఫున రాజ్యసభకు పంపారు.

ఆ సందర్భంలో జగన్ ను అనల్పంగా కీర్తించిన ఆర్ కృష్ణయ్య ఇప్పుడు తెలుగుదేశానికి దగ్గరయ్యే ప్లాన్ తో ఉన్నారా? అని అనిపిస్తోంది. ఒకప్పట్లో తెలుగుదేశం నాయకుడిగానే ఉన్న ఆర్ కృష్ణయ్యకు ఇప్పుడు, ఆ పార్టీలో ఎంట్రీ దొరక్కపోతే గనుక.. వారి ప్రాపకంతో బిజెపిలోకి వెళ్లవచ్చునని కూడా విశ్లేషకులు భావిస్తున్నారు.

ఆర్ కృష్ణయ్య ఒకప్పట్లో కేవలం కుల సంఘాల పోరాటాల వరకు పరిమితమై ఉండేవారు. బీసీలకు రాజ్యాధికారం లక్ష్యంగా ఒక రాజకీయ పార్టీ స్థాపించాలని కూడా కలలు కన్నారు. చివరికి తెలుగుదేశం పార్టీకి దగ్గరయ్యారు. ఆంధ్రప్రదేశ్ రాష్ట్ర విభజన తర్వాత.. 2014లో రెండు తెలుగురాష్ట్రాలకు తొలిసారిగా ఎన్నికలు జరిగినప్పుడు.. ఆర్ కృష్ణయ్యను ముఖ్యమంత్రిగా అభ్యర్థిగా ప్రొజెక్టు చేస్తూ తెలుగుదేశం ఎన్నికలకు వెళ్లింది. తద్వారా తాము బీసీలకు పెద్దపీట వేస్తున్నట్టుగా ప్రచారం చేసుకోవడానికి తెలుగుదేశం ప్రయత్నించింది.

నిజానికి 2014 ఎన్నికల్లో తెలుగుదేశం విజయావకాశాలు చాలా ఘోరమైన పరిస్థితి. అప్పటికే తెలంగాణ ప్రత్యేక రాష్ట్రం విషయంలో చంద్రబాబునాయుడు రెండు కళ్ల సిద్ధాంతం.. ఆ పార్టీకి గరిష్టంగా చేటు చేసి ఉంది. ఎటొచ్చీ పార్టీ అధికారంలోకి వచ్చేది లేదు గనుక.. ఆర్ కృష్ణయ్యను సీఎం అభ్యర్థిగా ప్రొజెక్టు చేశారనే ప్రచారం అప్పట్లో బాగా జరిగింది.

ఎల్బీనగర్ నుంచి ఎమ్మెల్యేగా గెలిచిన ఆర్ కృష్ణయ్య తెలుగుదేశం కుట్రను అర్థం చేసుకున్నారు. ఆ తర్వాత ఆ పార్టీకి దూరం జరిగారు. కేవలం కుల సంఘాల నాయకత్వానికి పరిమితం అయి ఉండిపోయారు. అలాంటి ఆర్ కృష్ణయ్యను జగన్ ప్రత్యేకంగా తెలంగాణ నుంచి దిగుమతి చేసుకుని రాజ్యసభ సభ్యత్వం కట్టబెడితే.. సార్వత్రిక ఎన్నికల్లో పార్టీ ఓడిపోగానే.. ఆయన రాజీనామా చేసేశారు. తద్వారా జగన్ చేసిన మేలును తృణీకరించి జగన్ మీద విమర్శలు కురిపించారు.
ఆయన భాజపా లో చేరే అవకాశం ఉన్నదని అప్పట్లో ప్రచారం జరిగింది. తీరా ఇప్పుడు ఆయన తెలుగుదేశంలో చేరుతారా అనే అనుమానాలు కలుగుతున్నాయి.

తాజాగా జాతీయ బీసీ సంక్షేమ సంగానికి అధ్యక్షుడు అయిన ఆర్ కృష్ణయ్య.. ఆ సంఘం ఏపీ రాష్ట్ర శాఖ అధ్యక్షుడిగా వై నాగేశ్వరరావును నియమించారు. ఆయన తెలుగుదేశం అనుకూలుడిగా పేరుంది. వై నాగేశ్వరరావును తెలుగుదేశం బీసీ నాయకులు టీడీ జనార్దన్, బీద రవిచంద్ర, నూకసాని బాలాజీ తదితరులు ఘనంగా సత్కరించారు. ఈ నియామకం ద్వారా ఆర్ కృష్ణయ్య తెలుగుదేశానికి మళ్లీ దగ్గరవడానికి, లేదా, వారి ద్వారా జాతీయ రాజకీయాల్లోనే ఉండేలా భాజపాలోకి ఎంట్రీ ఇవ్వడానికి ప్రయత్నిస్తున్నారా? అనే అనుమానాలు ప్రజల్లో కలుగుతున్నాయి.