చెప్పుల‌తో కొడ‌తారు… బొలిశెట్టికి వార్నింగ్‌!

విశాఖ స్టీల్ ప్లాంట్ ప్రైవేటీక‌ర‌ణ‌కు కార్మిక సంఘాల నాయ‌కులే కార‌ణ‌మ‌ని, వాళ్ల చెంప‌లు ప‌గ‌ల‌గొట్టాలంటూ అవాకులు చెవాకులు పేలిన జ‌న‌సేన నాయ‌కుడు బొలిశెట్టి స‌త్య‌నారాయ‌ణ‌పై ఆగ్ర‌హం పెల్లుబికుతోంది. తాళి ఒక‌రికి క‌ట్టి, మ‌రొక‌రితో సంసారం చేస్తున్నారంటూ త‌మ‌పై నోరు పారేసుకున్న బొలిశెట్టిపై కార్మిక నేత‌లు విరుచుకుప‌డుతున్నారు. బొలిశెట్టికి ఘాటుగా కౌంట‌ర్ ఇచ్చారు.

అవాకులు చెవాకులు పేలితే , కార్మికుల‌కు కోపం వ‌స్తే చెప్పుల‌తో కొడ‌తార‌ని విశాఖ ఉక్కు ప‌రిర‌క్ష‌ణ పోరాట క‌మిటీ చైర్మ‌న్ ఆదినారాయ‌ణ వార్నింగ్ ఇచ్చారు. కార్మిక సంఘాల పోరాటం వ‌ల్లే స్టీల్ ప్లాంట్ ప్రైవేటీక‌ర‌ణ నిలిచింద‌ని గ‌తంలో ప‌వ‌న్‌క‌ల్యాణ్ చెప్ప‌డాన్ని ఆయ‌న గుర్తు చేశారు. జ‌న‌సేన నాయ‌కుడు ఇప్పుడు ఇట్లా మాట్లాడ్డం ఏం ప‌ద్ధ‌త‌ని ఆయ‌న నిలదీశారు.

త‌మ పోరాటాల‌న్ని కించ‌ప‌రిచేలా మాట్లాడితే ఊరుకునేది లేద‌న్నారు. కూట‌మి అధికారంలోకి వ‌చ్చిన త‌ర్వాత స్టీల్ ప్లాంట్ ప్రైవేటీక‌ర‌ణ‌ను ఆపేందుకు ఎలాంటి ప్ర‌య‌త్నం జ‌ర‌గలేద‌ని ఆయ‌న అన్నారు. దీంతో కార్మికుల్లో ఆందోళ‌న క‌లుగుతోంద‌న్నారు. అందువల్లే డిప్యూటీ సీఎం ప‌వ‌న్‌క‌ల్యాణ్‌ను క‌ల‌వాల‌ని అనుకుంటున్న‌ట్టు ఆదినారాయ‌ణ తెలిపారు.

ఉక్కు ప‌రిర‌క్ష‌ణ పోరాట క‌మిటీ నాయ‌కుడు నీరుకొండ రామ‌చంద్ర‌రావు మాట్లాడుతూ ద‌మ్ముంటే బొలిశెట్టి ఒక నెల కార్మిక నాయ‌కుడిగా వుంటే కార్మికులు ఎవ‌రిని కొడ‌తారో అర్థ‌మ‌వుతుంద‌న్నారు. ప్రైవేటీక‌ర‌ణ చేస్తున్న బీజేపీ పంచ‌న చేరి అవాకులు చెవాకులు పేలితే గ‌ట్టిగా బుద్ధి చెబుతామ‌ని ఆయ‌న హెచ్చ‌రించారు.

సీఐటీయూ నాయ‌కుడు మాట్లాడుతూ స్టీల్ ప్లాంట్ ప్రైవేటీక‌ర‌ణ‌ను అడ్డుకోవ‌డంలో ప‌వ‌న్‌క‌ల్యాణ్ ఫెయిల్ అయ్యార‌ని విమ‌ర్శించారు. ప్ర‌జ‌లు అన్నీ గ‌మ‌నిస్తున్నార‌ని, త‌గిన బుద్ధి చెబుతార‌ని ఆయ‌న హెచ్చ‌రించారు.