ప్రకాష్ రాజ్ టాలీవుడ్ కెరీర్ ప్రశ్నార్థకం?

ప్రకాష్ రాజ్ కు వివాదాలు కొత్త కాదు. కెరీర్ స్టార్టింగ్ నుంచి ఆయన చుట్టూ పలు వివాదాలు ముసురుకున్నాయి. తన మాటలు, చేతల కారణంగా ఎన్నో కాంట్రవర్సీలు క్రియేట్ చేసిన ఈ విలక్షణ నటుడు.. ఇప్పుడు టాలీవుడ్ కు దూరమయ్యే ప్రమాదం ఉందంటోంది ఓ సెక్షన్. దానికి కారణం లడ్డూ ఇష్యూ.

తిరుమల లడ్డూ ఇష్యూలో ప్రకాష్ రాజ్ తలదూర్చారు. పవన్ కల్యాణ్ కు ఎదురెళ్లారు. ట్వీట్లతో ఓ రేంజ్ లో ఆడేసుకుంటున్నారు. ఇదే అతడి టాలీవుడ్ కెరీర్ ను ప్రశ్నార్థకంగా మార్చిందంటున్నారు కొందరు.

మెగా అండదండలు పోయినట్టే..!

టాలీవుడ్ లో ప్రకాష్ రాజ్ కు కొండంత అండ మెగా కాంపౌండ్. మూవీ ఆర్టిస్ట్ అసోసియేషన్ ఎన్నికల్లో ప్రకాష్ రాజ్ కు అన్ని విధాలుగా సహకారం అందించింది మెగా కాంపౌండ్. స్వయంగా నాగబాబు రంగంలోకి దిగి అన్నీ చూసుకున్నారు. ఒక దశలో పవన్ కల్యాణ్ కూడా ఆయనకు మద్దతుగా నిలిచారు.

ఇప్పుడు అదే పవన్ కల్యాణ్ తో మాటల యుద్ధానికి తెరదీశారు పవన్ కల్యాణ్. నిజానికి ప్రకాష్ కు పవన్ పై కోపం కాదు. పవన్, బీజేపీకి దగ్గరగా ఉన్నారనేది ఆయన కోపం. ఇదే విషయంపై గతంలో కూడా పవన్ ను నిలదీసిన ప్రకాశ్ రాజ్, ఇప్పుడు తిరుపతి లడ్డూ విషయంలో పవన్ ను నేరుగా ప్రశ్నించడం మొదలుపెట్టారు. బీజేపీ భావజాలాన్ని పూసుకోవద్దని సూచిస్తున్నారు. ఇది పవన్ తో పాటు, మెగా కాంపౌండ్ కు కూడా నచ్చడం లేదు.

ఆల్రెడీ కొందరికి దూరం…

పరిశ్రమలో యాక్టింగ్ టాలెంట్ తో పాటు లౌక్యం చాలా అవసరం. తామరాకుపై నీటిబొట్టు తరహాలో ఉన్నవాళ్లదే ఇక్కడ రాజ్యం. పేర్లు ప్రస్తావించలేం కానీ, కొంతమంది పరభాషా నటులు ఓ రేంజ్ లో టాలీవుడ్ లో అవకాశాలు పొందడానికి ఇదే కారణం. అయితే ఈ ‘ప్రత్యేక’ లక్షణం ప్రకాష్ రాజ్ కు మొదట్నుంచి లేదు.

ఆయన గతంలోనే ఫిలింఛాంబర్ తో గొడవ పెట్టుకున్నారు. ‘మా’ ఎన్నికలతో నేరుగా మంచు కుటుంబానికి, పరోక్షంగా నందమూరి కుటుంబానికి దూరమయ్యారు. మధ్యలో శ్రీనువైట్ల లాంటి దర్శకుల్ని కూడా దూరం చేసుకున్నారు.

ఇలా తన దశాబ్దాల కెరీర్ లో ఒక్కొక్కర్ని, ఒక్కో వర్గాన్ని ఆయన దూరం చేసుకుంటూనే ఉన్నారు. తాజా పరిణామాలతో ఆయన మెగా కాంపౌండ్ కు కూడా దూరమైనట్టు కనిపిస్తోంది. ఇది ఇలానే కొనసాగితే, కొన్నేళ్లకు టాలీవుడ్ లో ప్రకాష్ రాజ్ కెరీర్ ప్రశ్నార్థకమౌతుంది.