సూప‌ర్‌సిక్స్ స్కీమ్స్ మ‌ల్లే.. ఎమ్మెల్సీ ప‌ద‌వుల హామీలు!

ఎన్నిక‌ల సంద‌ర్భంలో పొత్తులో భాగంగా కొంద‌రు టీడీపీ నేత‌ల‌కు చంద్ర‌బాబునాయుడు టికెట్లు ఇవ్వ‌లేక‌పోయారు. అలాంటి వాళ్లంద‌రినీ బుజ్జ‌గించి, పార్టీకే ప‌ని చేయ‌డానికి నాడు చంద్ర‌బాబు ప్ర‌యోగించిన అస్త్రం ఎమ్మెల్సీ ప‌ద‌వి. అధికారంలోకి రాగానే మొట్ట‌మొద‌ట వ‌చ్చే ఎమ్మెల్సీ ప‌ద‌వుల్లో మీకే న్యాయం చేస్తాన‌ని ఆశావ‌హులంద‌రితోనూ చంద్ర‌బాబు న‌మ్మ‌బ‌లికారు. ప్ర‌జ‌ల‌కు ఏ విధంగా అయితే , సంప‌ద సృష్టించి, జ‌గ‌న్‌కు మించి సంక్షేమ ల‌బ్ధి క‌లిగిస్తాన‌ని చంద్ర‌బాబు హామీ ఇచ్చారో, ఆశావ‌హుల‌కు కూడా వాళ్లు కోరుకున్న‌ట్టుగా మంచి ప‌ద‌వులు ఇస్తాన‌ని త‌న మార్క్ భ‌రోసా ఇచ్చారు.

దీంతో టికెట్ ద‌క్క‌క‌పోయినా, కూట‌మిని అధికారంలోకి తెచ్చుకోవాల‌ని టీడీపీ ఇన్‌చార్జ్‌లు శ‌క్తి వంచ‌న లేకుండా ప‌ని చేశారు. రాజ‌కీయ విభేదాల్ని ప‌క్క‌న పెట్టి మ‌రీ ప్ర‌భుత్వాన్ని తెచ్చుకోవాల‌ని తాప‌త్ర‌య‌పడ్డారు. ముఖ్యంగా పిఠాపురం టీడీపీ ఇన్‌చార్జ్ వ‌ర్మ‌కు ఎమ్మెల్సీ ప‌ద‌విని మొద‌టి విడ‌త‌లోనే ఇస్తాన‌ని చంద్ర‌బాబు హామీ ఇవ్వ‌డానికి సంబంధించిన వీడియో వైర‌ల్ అవుతోంది. అలాగే మ‌రికొంద‌రు టీడీపీ నాయ‌కులు కూడా ….ఎన్నిక‌ల స‌మ‌యంలో చంద్ర‌బాబు త‌మ‌కు ఎమ్మెల్సీ ప‌ద‌వి ఇస్తామ‌ని హామీ ఇచ్చార‌ని గుర్తు చేస్తున్నారు.

కానీ టీడీపీకి ద‌క్కిన మూడు ఎమ్మెల్సీ సీట్ల‌లో ఒక‌టి రెన్యువ‌ల్‌, మ‌రో ఇద్ద‌రికి కొత్త‌గా ఇచ్చారు. ఈ నేప‌థ్యంలో సూప‌ర్‌సిక్స్ ప‌థ‌కాల్ని అందిస్తాన‌ని హామీలిచ్చి, ఏ ర‌కంగా అయితే వాటి ఊసే ఎత్త‌డం లేదో, చివ‌రికి సొంత పార్టీ నాయ‌కుల‌కు కూడా అదే ర‌క‌మైన పొలిటిక‌ల్ ట్రీట్మెంట్ చంద్ర‌బాబు ఇచ్చార‌ని కొంద‌రు దెప్పి పొడుస్తున్నారు. ఇంత వ‌ర‌కూ ప్ర‌జానికంలోనే హామీల అమ‌లుకు నోచుకోలేద‌న్న ఆవేద‌న క‌నిపించేద‌ని, ఇప్పుడు నాయ‌కుల్లో కూడా చూడొచ్చ‌నే కామెంట్స్ వినిపిస్తున్నాయి.

ఎన్నిక‌ల్లో ప‌ని చేయించుకోడానికి ఎన్నెన్నో చెప్తార‌ని, అవ‌న్నీ అమ‌లుకు నోచుకుంటాయ‌ని ఆశించ‌డం వృథా అని టీడీపీ ఆశావ‌హులు వాపోతున్నారు. ఇప్పుడు ఇవ్వ‌లేని వాళ్ల‌కు 2027లో ద‌క్కే ఎమ్మెల్సీల ఆశ చూపుతున్నార‌ని వారు అంటున్నారు.

మోస‌పోయామ‌నే భావ‌న …మ‌న‌సుకు ఎంత నొప్పి క‌లిగిస్తుందో ఇప్పుడు అనుభ‌వంలోకి వ‌స్తోంద‌ని, బ‌హుశా సూప‌ర్ సిక్స్ ప‌థ‌కాల‌కు నోచుకోని ప్ర‌జ‌ల మాన‌సిక స్థితి కూడా అట్లే వుంటుందేమో అని నాయ‌కులు అంటున్నారు. ఎంత చెట్టుకు అంత గాలి అంటే ఇదో కాబోలు అనే చ‌ర్చ‌కు తెర‌లేచింది.