హీరోలు మాయ‌మై…!

నిజం మాట్లాడ‌డం ఒక సాధ‌న‌. అద్దం ముందు ప్రాక్టీస్ చేస్తూ వుండు. నీ క‌ళ్ల‌లోకి చూస్తూ కూడా అబ‌ద్ధ‌మే మాట్లాడ‌గ‌లిగితే నువ్వు అస‌లుసిస‌లైన మార్కెటింగ్ సీఈవో. నిన్ను చూసి అద్దం కూడా సిగ్గుప‌డితే రాజ‌కీయాల్లో చేరు. ప్ర‌జ‌ల‌కి నువ్వు చాలా అవ‌స‌రం. క‌ల‌ల్ని అమ్మే వాళ్ల కోసం వెయ్యి క‌ళ్ల‌తో ఎదురు చూస్తున్నారు. డ్రీమ్ మ‌ర్చంట్స్ దివాళా తీయ‌రు.

జీవితం ఒక సినిమా అయితే. స్క్రిప్ట్ దేవుడిది. యాక్టింగ్ నీది. నీ కథ‌లో కూడా హీరోవి కాలేవు. నాయ‌కుడు అనేది క‌ల్పిత ప‌దం. ప్ర‌తినాయ‌కుడే శిలాశాస‌నం. హీరోలు మాయ‌మై చాలా కాల‌మైంది. విల‌న్లే త‌మ‌ని తాము హీరోలనుకుంటున్నారు. ఆ విష‌యం వాళ్ల‌కు ఎవ‌రూ చెప్ప‌రు. చెప్పినా న‌మ్మ‌రు.

బ‌త‌క‌డం ఎవ‌రూ నేర్పే ప‌నిలేదు. ప్ర‌కృతే నేర్పిస్తుంది. తిండికోసం ఎంత దూరం ఎగిరినా ప‌క్షి త‌న చెట్టుని, గూడుని మ‌రిచిపోదు. దానికి గూగుల్ మ్యాప్ వుండ‌దు. వేల కూన‌ల్లో కూడా త‌న బిడ్డ‌ని గుర్తు ప‌ట్ట‌గ‌ల‌దు. మెమ‌రీ ప‌వ‌ర్ ఎక్క‌డా నేర్చుకోదు. జ్ఞాప‌క‌మే జీవితం.

స‌త్యం జ‌యిస్తుంది నిజ‌మే కానీ, ఆఖ‌రి రీల్‌లో, అంప‌శ‌య్య మీద. కోమాలో వున్న‌వాడికి డాక్ట‌ర్ గెలిస్తే ప్ర‌యోజ‌నం కానీ, ధ‌ర్మం గెలిస్తే ఏం ఉప‌యోగం? అయినా వైద్యం, ధ‌ర్మం ఇపుడు వేర్వేరు విష‌యాలు. వైద్యం, ధ‌నం పాలునీళ్ల‌లా క‌లిసిపోయాయి.

న‌క్క‌లు, తోడేళ్ల‌కి అడ‌వుల్లో జీవ‌నం క‌ష్ట‌మై న‌గ‌రాల‌కి వ‌ల‌స‌లు వ‌చ్చాయి. హ్యూమ‌న్ రీసోర్సస్ నిండా అవే. మాన‌వ వ‌న‌రుల్ని బాగా అర్థం చేసుకుంటున్నాయి.

త‌మ‌కి ద‌క్క‌ద‌ని తెలిసినా తేనెటీగ‌లు తేనె పెడుతూనే వుంటాయి. ఇత‌రుల శ్ర‌మ‌ని దోచుకోవ‌డం మ‌నిషి మొద‌ట తేనెప‌ట్టు నుంచే నేర్చుకున్నాడు.

అడవిలో ప‌క్షులు పాడుతున్నాయ‌ని సంతోష‌ప‌డ‌కు. క్రూర‌మృగాలు వ‌స్తున్న‌పుడు అవి పాట ద్వారానే హెచ్చ‌రిస్తాయి.

వెన్నెల అందంగా వుంటుంది. అన్నీ స్ప‌ష్టంగా క‌నిపిస్తాయి. వేట‌గాడి చూపు కూడా ప‌దునుగా వుంటుంది. జాగ్ర‌త్త‌.

స‌ముద్రంలో క‌లిసేట‌ప్పుడు న‌ది గ‌జ‌గ‌జా వ‌ణుకుతుంది. అనంత‌మైన కొత్త ప్ర‌పంచాన్ని స్వీక‌రించ‌డం, అంగీక‌రించ‌డం చాలా క‌ష్టం. పంజ‌రాల‌కి అల‌వాటుప‌డిన వాళ్లు రెక్క‌లున్నాయ‌నే విష‌యం మ‌రిచిపోతారు. బుద్ధుడు రాజ్యాన్ని వ‌దిలేసిన‌ట్టు , కంఫ‌ర్ట్ జోన్ నుంచి బ‌య‌టికి వ‌స్తే నువ్వే ఒక కొత్త ఆవిష్క‌ర‌ణ‌.

కంచిలో చీర‌లే కాదు, క‌థ‌లు కూడా కావాల్సిన‌న్ని వుంటాయి. దుకాణ‌దారులే మాస్ట‌ర్ స్టోరీ టెల్ల‌ర్స్‌.

చీమ‌లు త‌మ ఆత్మ‌క‌థ రాసుకుంటే త‌ప్ప‌, పాముల దురాక్ర‌మ‌ణ ప్ర‌పంచానికి తెలియ‌దు. నిచ్చెన ఎక్కిన వాడి గురించే అంద‌రూ మాట్లాడుతారు. నిచ్చెన త‌యారు చేసిన వాడు ఎవ‌రికీ తెలియ‌దు.

విజ‌యం అంటే ప‌ది మంది క‌ష్టం మీద పైకి ఎద‌గ‌డ‌మే. నెత్తిన క‌ళ్లు ఉన్న‌పుడు ఆకాశం త‌ప్ప ఇంకేమీ క‌న‌ప‌డ‌దు. భూమ్యాక‌ర్ష‌ణ అంటే ఎంత‌టి వాడినైనా నేల‌మీద‌కి దించ‌డ‌మే.

అద్భుత జ్ఞాప‌క‌శ‌క్తి వుంటేనే నాయ‌కుల‌వుతారు. రోజూ వేలాది అబ‌ద్ధాలు ఆడేవాడికి ఎక్క‌డ ఏ అబ‌ద్ధం చెప్పాడో గుర్తుండాలి. లేదంటే వీడియోల‌కి దొరికిపోతారు.

బాధ‌ని గుర్తించిన వాడికే సంతోషం విలువ తెలుస్తుంది అంటుంది సామ‌వేదం. దుఃఖాన్ని గుర్తు ప‌ట్టాలంటే మూడో క‌న్ను వుండాలి. గుడ్డివాళ్ల రాజ్యంలో ఒంటికంటి వాన్ని కూడా బ‌త‌క‌నివ్వ‌రు. ఇక మూడో క‌న్ను వుంటే?

క‌ష్టాల్లో ఉన్న‌ప్పుడు నీళ్లు త‌క్కువ తాగు. క‌న్నీళ్లు కొంచెమైనా త‌గ్గుతాయి.

జీఆర్ మ‌హ‌ర్షి