ఎమ్బీయస్‍: పెర్ల్స్, గళ్స్ అండ్ మాంటీ

పిజి ఉడ్‌హౌస్ 1972లో రాసిన ‘పెర్ల్స్, గళ్స్ అండ్ మాంటీ బోడ్కిన్’ అనే నవల కథా సంగ్రహం యిది. అనగనగా మాంటీ అనే హీరో. అతనికి వారసత్వంలో డబ్బు కలిసివచ్చింది. అతనికో గళ్‌ఫ్రెండ్ గెర్‌ట్రూడ్‌తో (హీరోయిన్ అనుకుందాం) ఎంగేజ్‌మెంట్ అయింది. వాళ్ల నాన్నకి మాంటీ నచ్చలేదు. ‘కష్టార్జితానికే విలువ. నీకు డబ్బున్నా సరే, సొంతంగా ఉద్యోగం సంపాదించి, ఒక ఏడాది పాటు చేసి డబ్బు సంపాదిస్తేనే పిల్లనిస్తానన్నాడు. అందుచేత వారసత్వపు డబ్బు ముట్టుకోకుండా జీతంతో డబ్బు సంపాదించి ఆయనకి చూపిద్దామని హీరో తాపత్రయం. ఓసారి లండన్ నుంచి న్యూయార్క్‌కి వెళ్లే ఓడలో వాళ్లిద్దరూ వెళుతూండగా వస్తూండగా ఓ డబ్బున్న సినీనిర్మాత కనబడ్డాడు. అతను తన భార్య కోసం కొన్న ఖరీదైన నెక్లెసు ఉంది కానీ అది బయటపడితే పన్ను కట్టవలసి వస్తుంది. హీరో, ఫ్రెండు కలిసి టెడ్డీ బేరులో పెట్టి ఆ నెక్లెసును బయటకు స్మగుల్ చేసేశారు. దానికి సంతోషించిన నిర్మాత యితనికి న్యూయార్క్‌లో ప్రొడక్షన్ మేనేజరుగా ఉద్యోగం యిచ్చాడు.

హీరో పని చేసే కంపెనీ లోనే అతని సెక్రటరీగా శాలీ అనే ఓ అమ్మాయి చేరింది. అతనంటే ఆరాధన పెంచుకుంది. కానీ హీరో ఆలోచనలన్నీ హీరోయిన్ చుట్టూరా తిరుగుతూ ఉంటాయి. సెక్రటరీని ఓ ఫ్రెండుగా భావించి విషయాలన్నీ చెబుతుంటాడు. ఓ ఏడాది నడిపాక యజమాని ఇక వ్యాపారం చాల్లే అనుకుని బ్రాంచ్ మూసేసాడు. హీరోని వేరేచోట ఉద్యోగం చూసుకోమని చెప్పాడు. హీరో లండన్‌కి తిరిగి వచ్చి హీరోయిన్ తండ్రి వద్దకు వెళ్లి, పెళ్లికి అనుమతి అడిగేడు. నువ్వు ఈ ఉద్యోగం ఎలా సంపాదించావో మా అమ్మాయి చెప్పేసింది. ఇది కష్టార్జితం కాదు. వెళ్లి కష్టపడి సంపాదించుకురా అన్నాడు హీరోయిన్ తండ్రి. చేతిలో డబ్బున్నా హీరో ఉద్యోగం వేటలో పడ్డాడు. అప్పుడు అక్కరకు వచ్చింది పాత ఉద్యోగంలో తారసిల్లిన సెక్రటరీ శాలీ!

ఇప్పుడా అమ్మాయి ఓడలో కలిసిన ధనిక నిర్మాత లండన్ శివార్లలో ఓ కంట్రీ హౌస్ అద్దెకు తీసుకుని, తన సినిమా స్టూడియో చరిత్ర రాయడానికి పూనుకున్నాడు. అతని భార్య గ్రేస్ దగ్గర శాలీ సెక్రటరీగా పని చేస్తోంది. గ్రేసీ నిర్మాతకు ఐదవ భార్య. చాలా డామినేటింగ్. డబ్బున్నాయనకు పేరుకే డబ్బుంది. గాంబ్లింగ్ చేసి డబ్బు పోగొట్టేస్తాడన్న భయంతో భార్య అస్తంతా జాయింటు ఎక్కవుంటులో పెట్టించింది. నిర్మాతకు అనుభవించడానికి లేదు. మనసారా తిండి తినడానికి లేదు. (అనారోగ్యం ఉంది లెండి). శాలీ తన యజమానురాలు గ్రేసీ వద్దకు హీరోని తీసుకెళ్లి ఓ జమీందారు మేనల్లుడని చెప్పి, ప్రస్తుతం ఉద్యోగం కావాలని చెప్పింది.

భర్త వద్ద కారు డ్రైవరుగా మాత్రమే ఉద్యోగమే ఖాళీ ఉందంటే దానికి సరేనన్నాడు హీరో. తర్వాత తన స్వంత డబ్బుతో యజమానికి అవీ ఇవీ కొని పెట్టి ఆత్మీయుడై పోయాడు. భార్య అతని చేత బలవంతంగా డైటింగ్ చేయిస్తూంటే జాలిపడ్డాడు. ఓ అర్ధరాత్రి శాలీ ప్రోద్బలంతో ఆయన కోసం కేకు పట్టుకెళుతూంటే ఆయన సవతికూతురు కళ్లల్లో పడ్డాడు. ఆమె ఇతన్ని దొంగ అనుకుని గదిలో పెట్టి గడియ వేసింది. నిర్మాత సహాయంతో హీరో ఎలాగోలా తప్పించుకుని బయటపడ్డాడు.

ఈ సవతి కూతురు నిర్మాత ప్రస్తుత భార్యకు పూర్వ వివాహం వల్ల పుట్టిన అమ్మాయి. పెళ్లి కాలేదు. వేరే చోట ఉంటుంది. తల్లి దగ్గర ఉన్న ఓ ఖరీదైన ముత్యాలహారం గురించీ మహా వర్రీ అవుతూ ఉంటుంది. దాన్ని పెళ్లికి బహుమతిగా ఇస్తానని తల్లి ప్రామిన్ చేసింది. అదెక్కడ పోతుందోనని ఆమెకు భయం. తల్లికి చెప్పి ఓ డిటెక్టివుని ఏర్పాటు చేయించింది. భర్త దగ్గర వేలేగా చేర్పించింది. వాడో నాసిరకం దొంగ. నిర్మాతకు ఆర్భాటం చేసుకుంటూ వచ్చేసరికి ఇంట్లో అప్పటికే తిష్ట వేసుకుని కూచున్న ఓ టక్కరి జంట కనబడ్డారు. ఆ జంటలో భర్త స్కీముల పేరు పెట్టి జనాలను ఆకర్షిస్తూ ఉంటాడు. భార్య ఇంకా ధైర్యవంతురాలు. సమయం చూసి వస్తువులు మూట గట్టుకుని పారిపోతూ ఉంటుంది.

వాళ్లను చూడగానే గుర్తుపట్టి డిటెక్టివ్ బేరానికి దిగాడు. ‘వీళ్ల దగ్గర్నుంచి హారం కొటేద్దాం. నాకు 60%, తక్కినది మీకు’ అన్నాడు. ఆ పప్పులేం ఉడకవ్ అన్నారు వాళ్లు. పగలు హీరోని చూసిన సవతి కూతురు రాత్రి తనకు ఎదురయిన దొంగ వీడేనా అని అనుమాన పడింది. తల్లిని హెచ్చరించ బోయింది. ‘అబ్బే, అతను ఓ జమీందారు ‘మేనల్లుడు’ అని కొట్టి పారేసింది తల్లి.

హారం కొట్టేయడానికి టక్కరి జంట ఓ ప్లాను వేశారు. “ఎవరో దొంగ బయట నుండి వచ్చినట్టు అడావుడి చేసి ఆవిణ్ని బయటకు లాక్కొస్తాను. నువ్వు వెళ్లి హారం పట్టుకొచ్చేయ్.” అని భర్తకు చెప్పింది భార్య. అలాగే చేసింది కానీ భర్త దొంగిలించే సమయానికి అక్కడికి డిటెక్టివ్ దాపురించాడు. జాగ్రత్త అని హెచ్చరించి వదిలేశాడు. దొంగాడు కనబడక తిరిగొచ్చిన డబ్బున్నావిడ వద్దకు కూతురు వచ్చి “హీరోయే దొంగాడు. నిన్ను చూసి పారిపోయి వుంటాడు’ అని మళ్లీ చెప్పింది.

ఈలోగా హీరో, హీరోయిన్‌కు తన పరిస్థితిని వివరిస్తూ ఉత్తరం రాసాడు. ఆ అమ్మాయి అమాయకంగా తండ్రికి అంతా చెప్పేసింది. ఓ జమీందారు మేనల్లుణ్నని అబద్ధం చెప్పుకుని హీరో ఉద్యోగం సంపాదించడం అతనికి నచ్చలేదు. డబ్బున్నాయన్ని డిన్నర్‌కి పిలిచి మీ డ్రైవరు సంగతి ఇదీ అని చెప్పేశాడు. డబ్బున్నాయన హీరోని సమర్థించాడు. ఇంటికి తిరిగొచ్చి ఇలాంటి కండిషన్లు పెట్టే అమ్మాయిని పెళ్లి చేసుకోకు అని ఉచిత సలహా పారేశాడు. సెక్రటరీ శాలీ లాటి మంచి అమ్మాయిని చేసుకో అన్నాడు. “లేదు ఆ అమ్మాయి వేరెవర్నో ప్రేమిస్తోంది. అతన్ని వెతుకుతూనే ఈ ఊరు వచ్చానని నాతో చెప్పింది” అన్నాడు హీరో. నిజమే, ఆ అమ్మాయి బహిరంగంగా హీరోతో తన ప్రేమ వెల్లడించలేక అలా చెప్పింది.

ఇది ఇలా ఉండగా ఊళ్లో ఓ పార్టీ జరిగింది. అక్కడ డబ్బున్నాయన, హీరో, సెక్రటరీ వెళ్లి డాన్సు చేసి నానా హడావుడి చేసేరు. పోలీసులు పట్టుకోవడానికి వస్తే తప్పించుకుని పారిపోబోయారు. అప్పటిదాకా సరదాగా కబుర్లు చెప్పిన హీరో పాత ఫ్రెండు (ఓడలో నగ స్మగుల్ చేయడానికి సహకరించిన వాడు) తను మఫ్టీలో ఉన్న పోలీసునని చెప్పి అరెస్టు చేయబోయాడు. ఇతను హీరోయిన్ గెరాల్డ్‌ను ప్రేమించాడు. ఆమె కూడా యితన్ని ప్రేమించింది కానీ హీరోతో చేసుకున్న ఎంగేజ్‌మెంట్ బ్రేక్ చేయడం సభ్యత కాదని ఆగింది. ఇప్పుడు మాంటీని అరెస్టు చేస్తే, ఆ పేరు చెప్పి, గెరాల్డ్ ఎంగేజ్‌మెంట్ బ్రేక్ చేసి తనను పెళ్లాడుతుంది కదాని అతని ఆలోచన. సెక్రటరీ శాలీ వెంటనే ఓ చెత్తబుట్ట అతని నెత్తి మీద కుమ్మరించి హీరోను, యజమానిని రక్షించింది.

ఈ త్యాగానికి మురిసిపోయాడు మాంటీ, నిర్మాత కూడా. కార్లో తిరిగి వచ్చేటప్పుడు నిర్మాత హీరోకి నచ్చ చెప్పాడు. – ఆ హీరోయిన్ని వదిలేసి ఈ అమ్మాయిని పెళ్లి చేసుకో. ఆమె ప్రేమించేది నిన్నేట అని. (అప్పుడా అమ్మాయి కారు వెనక సీట్లో నిద్రపోతోంది). ‘ఇవాళ ఆమెతో డాన్సు చేస్తూ ఉంటే నాకూ అదే అనిపించింది. కానీ హీరోయిన్‌తో నాకు ఎంగేజ్‌మెంట్ అయిపోయింది. మాట తప్పడం మా వంశంలో లేదు. ఆమె అంతట ఆమె తెగతెంపులు చేసుకుంటే తప్ప నేను ఎంగేజ్‌మెంట్ బ్రేక్ చేయను’ అన్నాడు హీరో.

నిర్మాత సవతి కూతురికి ఓ జ్యూవెలర్‌తో పరిచయం అయింది. అతని సలహా మేరకు ఇంట్లో ఉన్న ముత్యాల హారం, మిగతా నగలు తక్షణం బ్యాంక్‌లో పెట్టించేయమని తల్లికి ఫోన్ చేసింది. ఆవిడ డిటెక్టివుని పిలిచి రేపు బ్యాంకులో ఇవన్నీ పెట్టేసిరా అంది. డిటెక్టివ్ పొంగిపోయాడు. హాయిగా విజిల్ వేసుకుంటూ తిరుగుతూంటే టక్కరి జంటలో భార్య కనబడి ఏమిటి సంగతి అంది. హుషారులో సంగతి చెప్పేశాడు – ‘నేను కష్టపడ నక్కరలేకుండా అవి నా చేతికే వస్తున్నాయి. పట్టుకుని ఉడాయిస్తా’ అని. ‘‘అలాగా!? అయితే ఇప్పుడే వెళ్లి ఆవిడకి చెప్పేస్తా. నువ్వు నన్ను ఎక్స్‌పోజ్ చేసినా ఫర్వాలేదు. నీకు మాత్రం దక్కనివ్వను” అందామె. ‘అయితే ఏం చేయమంటావ్?’ అన్నాడు డిటెక్టివ్ వెర్రి మొహం వేసి. “జ్వరం వచ్చింది, బ్యాంకుకి వెళ్లలేనని చెప్పు. నగలు ఇంట్లోనే ఉంటే ఎప్పుడో ఒకప్పుడు మరో ఛాన్సు రాకపోదు” అంది ఆమె.

ఆ ప్రకారమే డిటెక్టివ్ జ్వరం అని చెప్పేశాడు. దాంతో ఇక గతి లేక ఆవిడ హీరోని పిలిచి నువ్వే బ్యాంక్‌కి వెళ్లు అని చెప్పింది. యజమాని వద్దకు వెళ్లి చెప్పాడు హీరో. ఎగిరి గంతేశాడు నిర్మాత. ఒప్పుకో అని బలవంత పెట్టాడు. ఎందుకని అడిగితే చెప్పుకొచ్చాడు – చేతిలో డబ్బు ఆడక కటకట పడి, భార్య నగల మీద కన్నేశాడాయన. మెరుగు పెట్టిస్తానని చెప్పి పట్టుకెళ్లి డూప్లికేటు నగలు ఇచ్చి అసలువి అమ్మేసుకుని ఖర్చు పెట్టేశాడు. ఇప్పుడు బ్యాంకుకి వెళితే అసలు సంగతి బయట పడుతుంది. లేకపోయినా రేపు పెళ్లి అయ్యాక కాబోయే అల్లుడు జ్యూవెలర్ కాబట్టి పసిగట్టేస్తాడు. అందుకని హీరోయే వాటిని పట్టుకెళ్లినట్టు పట్టుకెళ్లి ఈయనకు ఇచ్చేయాలి. ఆవిడ అడిగితే దొంగలు వచ్చి చావగొట్టి, పట్టుకెళ్లి పోయారని చెప్పాలి.

ఇదంతా విని ‘దీనిలో నాకేం లాభం? అనుమానించి పోలీసు రిపోర్టు ఇస్తే నేను జైలు కెళ్లాలి’ అన్నాడు హీరో. ‘మరీ మంచిది. జైల్లో ఓ సారి పడ్డావని తెలిస్తే హీరోయిన్ నాన్న మండిపడతాడు. నీలాటి మర్యాదహీనుడితో సంబంధం తెంపుకోమని కూతురికి చెప్తాడు. ఆమె అంతట ఆమె ఎంగేజ్‌మెంటు బ్రేక్ చేసేస్తుంది. నీ ప్రతిజ్ఞకు భంగం వాటిల్లకుండా నువ్వు బయట పడవచ్చు. సెక్రటరీని పెళ్లాడవచ్చు.’ అన్నాడు నిర్మాత. సరేనన్నాడు హీరో.

కానీ ఆ ప్లానుకి అవాంతరం వచ్చింది, టక్కరి జంటలో భార్యవల్ల. హీరో నగలు తీసుకుని టౌనులో ఉన్న బ్యాంక్‌కి కారులో వెళుతూండగా ఆమె దారిలో కనబడి లిఫ్టు అడిగింది. సరేనని ఇచ్చినదాకా ఉండి కాసేపటికి పిస్తోలు తీసి నగలు మర్యాదగా అప్పగించమంది. కానీ ఆమె సంతోషం కొద్దిసేపు కూడా నిలవలేదు. కారు వెనక సీటులోంచి డిటెక్టివ్ లేచి, ఆమెను బెదిరించి నగలు తీసుకుని పారిపోయాడు. ఆమె గొల్లుమంటే హీరో ఓదార్చాడు, అవి నకిలీవేనని.

ఈ లోపున హీరోయిన్ తండ్రి డబ్బున్నావిడకి ఫోన్ చేసి హీరో గురించి, అతను అబద్ధం చెప్పి ఉద్యోగంలో చేరిన సంగతి చెప్పేసి జాగ్రత్త అని హెచ్చరించాడు. దాంతో దొంగలెత్తుకు పోయారని హీరో చెప్పిన కథను ఆవిడ నమ్మలేదు. ఇక గత్యంతరం లేక హీరో ‘అవి నకిలీవి, అసలువి మీ ఆయన ఎప్పుడో అమ్మేసుకున్నాడు’ అని చెప్పవలసి వచ్చింది.

దాంతో అనేక పరిణామాలు జరిగేయి. మొగుడు చేసిన మోసం విని ఆవిడ విడాకులు ఇచ్చి పారేసింది. పీడా పోయింది. హాయిగా ఇంకో పెళ్లి చేసుకోవచ్చను కున్నాడు నిర్మాత! ఈలోగా పోలీసాఫీసరు హీరోయిన్ దగ్గరికి వెళ్లి క్లబ్‌లో జరిగిన సంగతి చెప్పాడు. హీరో యింకో అమ్మాయితో కలిసి డాన్సు చేస్తున్నాడని, తను పట్టుకోబోతే పారిపోయారని చెప్పాడు. దాంతో ఆమెకు కోపం వచ్చి తండ్రికి చెప్పింది. తండ్రి మా అమ్మాయిని నీలాటి మర్యాదస్తుడికి యిచ్చి పెళ్లి చేస్తాను అని మాట యిచ్చాడు. తండ్రి మాటపై హీరోయిన్ తనంతట తానే ఎంగేజ్‌మెంట్ బ్రేక్ చేయడంతో హమ్మయ్య అనుకుని హీరో, సెక్రటరీని పెళ్లి చేసుకున్నాడు. ఇదీ కథ!

– ఎమ్బీయస్ ప్రసాద్ (మార్చి 2025)

mbsprasad@gmail.com