చైతూ పెళ్లి.. ఎన్-కన్వెన్షన్ ఉండుంటే..!

కొన్ని రోజుల కిందటి సంగతి.. హైడ్రా రాకతో నాగార్జున ఎంతో ఇష్టపడి నిర్మించుకున్న ఎన్-కన్వెన్షన్ కుప్పకూలింది. దానిపై ఇంకా కోర్టు కేసులు నడుస్తున్నాయి. అయితే అదే టైమ్ లో నాగార్జునకు చెందిన ఓ జ్ఞాపకం కూడా మాయమైంది.

నాగార్జునకు మొక్కలంటే చాలా ఇష్టం. ఓసారి రాజమండ్రి షూటింగ్ కు వెళ్లినప్పుడు ఓ మర్రి మొక్క ఆయన్ను ఎంతగానో ఆకర్షించింది. ఎంతో ఇష్టంగా దాన్ని తీసుకొచ్చి ఎన్-కన్వెన్షన్ వద్ద నాటాడు. కూల్చివేతల్లో భాగంగా ఆ మర్రి చెట్టు కూడా దెబ్బతింది.

కేవలం ఈ చెట్టు మాత్రమే కాదు, కన్వెన్షన్ చుట్టూ నాగార్జునకు చాలా జ్ఞాపకాలున్నాయి. అవన్నీ ఎప్పుడు తిరిగొస్తాయో ఆయనే చెప్పలేకపోతున్నాడు. ఇప్పుడు ఎన్-కన్వెన్షన్ అంశం తెరపైకి రావడానికి మరో కారణం కూడా ఉంది.

నాగచైతన్య-శోభిత పెళ్లికి రెడీ అవుతున్నారు. డిసెంబర్ లో పెళ్లి పెట్టుకున్నారు. ముందుగా డెస్టినేషన్ వెడ్డింగ్ అనుకున్నారు. ఆ ఆలోచనను విరమించుకొని రాజస్థాన్ లోని ఓ మంచి ప్యాలెస్ లో పెళ్లి అనుకున్నారు.

ఇప్పుడు ఆ ప్లాన్ నుంచి కూడా బయటకొచ్చి హైదరాబాద్ లోనే కొడుకు పెళ్లి చేయాలని అనుకుంటున్నారు నాగార్జున. ఎన్-కన్వెన్షన్ అందుబాటులో ఉంటే మరో ఆలోచన లేకుండా చైతూ-శోభిత పెళ్లి అక్కడే జరిగి ఉండేది. కానీ అదిప్పుడు లేదు. చైతూ పెళ్లి హైదరాబాద్ లో అనగానే ఇలా ఎన్-కన్వెన్షన్ మేటర్ మరోసారి తెరపైకొచ్చింది.

తాజా సమాచారం ప్రకారం, నాగచైతన్య-శోభిత పెళ్లిని అన్నపూర్ణ స్టుడియోస్ లో నిర్వహించాలని భావిస్తున్నారట నాగార్జున. ఫ్యామిలీ ఫంక్షన్ కాబట్టి తన స్టుడియోకు మించిన వేదిక మరొకటి ఉండదనే అభిప్రాయంలో ఉన్నారు.